游蕙禎中學開始談戀愛，她說戀愛史不多，十隻手指數得晒，桃花旺的她，男朋友是浪接浪，每個大概年多「貨仔」，直至3年多前邂逅現任男友，才真正找到靈魂伴侶，她說兩人是一見鍾情，拍拖3年都keep住心動，連現在賣古董相機都是受他影響。
談起男友她嘴角甜絲絲︰「男朋友對古董相機有認識，佢雖然唔係專業攝影師，但好多年前學過亦影咗相好耐，佢令我跌落呢個坑，好沉迷。我覺得情侶間互相分享知識很重要，否則我會覺得好悶。」過去幾年，男朋友跟她走過人生低谷，恍如明燈照亮她的方向，她說遇到他是人生最幸運的事情︰「佢唔只係支持，仲啟發我好多嘢，甚至係我修補家人關係嘅功臣，佢成日同我講有乜事都要返屋企，有人喺你身邊無條件支持你，我再無所求，滿足了。」
她與男朋友間難得惺惺相惜，磨合毫無難度︰「其實同一個人相處耐咗會知道對方諗乜，如果大家意見分歧，咪將兩樣嘢溝埋換個折衷辦法，我哋真係好少拗撬，係從心底明白對方諗法。」她最欣賞男友有腦，大家現在感情穩定，令她很有安全感。不過，過往她亦曾遇過渣男︰「都試過失手遇花心男，發現佢偷食，我細個會好不智咁同佢開拖，後來成熟咗諗返，當時應該一刀切，唔應該畀機會佢再傷害我。」