中國喺香港落實港版國安法，咁大件事梗要喺大陸大張旗鼓宣傳，以證明港版國安法有廣大中國人民支持，點知有關港版國安法書嘅條目，喺大陸豆瓣上架之後，竟然俾網民係咁畀最低嘅一星評分，仲要留言係咁踩。雖然呢啲網民評論喺外國係好平常，但喺中國就係明剃眼眉，所以凡留一星評分者，全部刪除賬號，再次向國際示範，有中國特色嘅網上自由係乜。
中國「豆瓣」網主要提供書籍、電影、音樂資料，用戶仲可以評分，今年8月中豆瓣陸續上傳幾個關於港區國安法嘅書籍條目，但上架不久就有大批豆瓣用戶發起一星運動，以示抵制，好似一本書名水蛇春咁長嘅書《中華人民共和國香港特別行政區維護國家安全法全國人民代表大會關於建立健全香港特別行政區維護國家安全的法律制度和執行機制的決定》，就畀大量網民評為一星，而書本仲有短評功能，用戶評一星都唔夠，仲留言話「香港淪陷」、「忘不了六月三十日那晚的絕望」。
中國政府又點容許港版國安法得一星，所以先對評一星用戶禁言，近日仲將全部賬號刪除，直情係「消滅」反對嘅用戶，仲連相關嘅書籍評分同短評功能關埋，等你冇得畀一星同講啲唔啱聽嘅留言。其實若然港版國安法真係有咁多大陸人支持，又使乜用到刪除賬號、禁評分評論呢啲招數。港版國安法喺大陸有幾多人撐，大家心中有數。
李八方