藍絲頻頻出動做紅衞兵，各大機構人心惶惶，皆因佢哋「有殺錯、冇放過」，不時傷及無辜，但當然亦凸顯佢哋有幾咁高嘅水平，最近中彈嘅係廉政公署。
話說藍絲群組近日瘋傳，廉署九龍灣分部公然支持「港獨」，鐵證如山！原來佢哋辦事處分部放咗棵小盆栽，花盆上竟然有「榮光」字眼，不容抵賴，據聞唔少藍絲已經去信廉署投訴，做好國家嘅好兒女！
八方睇過藍絲瘋傳張相，個小小花盆的確印有「榮光」二字，但細心一睇，其實仲有兩隻字見唔到，完整係有四隻字：「敗者榮光」。「敗者榮光」其實係來自日本高達系列「新機動戰記高達W Endless Waltz 敗者榮光」漫畫，當然藍絲作風梗係，有理無理投訴咗先！
廉署回覆八方嘅查詢時就話，擺放相關小盆栽嘅位置，屬於廉署東九龍及西貢分區辦事處接待公眾嘅地方。廉署社區關係處人員初步了解後，得悉小盆栽屬該分處一名文職人員個人擁有，而盆上共寫有四個中文字，嚟自一齣日本卡通動畫。發言人話呀，署方已即時要求呢位文職人員將盆栽移走，並向各分區辧事處員工重申，唔可以將私人物品擺喺公眾地方，強調會嚴肅處理及跟進上述個案。