話說保皇派陣營近期出現一份號稱係智庫級出品嘅研究報告流傳，標題仲係威係勢，叫《關鍵的一年︰建制陣營重整旗鼓策略》，似乎開宗名義想「指導」建制派翻身，收到嘅人仲被溫馨提示「不宜外傳」，但咁石破天驚嘅巨獻，八方睇過內容，發現除咗為建制打贏選戰出謀獻策外，仲好大膽咁對中聯辦、港府指手劃腳，究竟邊個智庫搞呢份嘢出嚟？
份「研究報告」以網上刊物形式現身，仲有個一聽就知意見係偏埋一邊嘅名叫《藍調》（圖），第一期6月尾已經出現兼打國安法牌，份嘢出處大概有兩個說法，係某位國家領導人催生嘅智庫，亦有人話係嚟自有份量建制中人牽頭成立嘅研究中心負責執筆，仲話中心近年先成立，有研究過去呢年幾嘅反修例運動。
香港保皇陣營名下智庫話多唔多，近年出現嘅就包括由老董牽頭嘅團結香港基金；今年老董仲再同689聯手搞出個香港再出發大聯盟，689今年3月又成立過一個穩定基金會有限公司，董事包括梁粉張志剛、律師好友薛建平同陳維良。立法會前主席曾鈺成近年亦牽頭成立咗個智庫「香港願景計劃」，但數來數去都唔係百分百脗合，因為如果認為自己有影響力講嘢又值得聽，點解要咁藏頭露尾呢？
至於份報告有乜噏？原來係建議建制派加強服務齊心抗疫、推動選民登記，又認為要以李梓敬同何君堯做賣點，推動多元網絡宣傳，同建立具備政策研究同心戰室功能嘅「中央廚房」主導輿論，但最震撼係點名中聯辦，話「調任頻仍、對港情未必熟悉」，仲建議西環要善用本地建制人才，須知道，中聯辦早前先自封係「代表中央」，唔係中央所屬部門，呢份報告竟然夠膽妄議中央以下犯上先？
李八方