新一季英超將喺今個周末開鑼，有英媒報道，為確保球季可以喺緊迫嘅時間內完成，賽會已通知咗全部20間球會，就算開季後英國再爆發武漢肺炎，只要可湊夠14人，當中包括U21球員，球隊就要如期比賽，令賽季受疫情影響延期嘅機會減至最低。有餓波球迷唔希望見到球季又停擺，亦有人認為咁同夾硬嚟冇分別，冇理會球員死活。
據《每日郵報》報道，上季英超因疫情影響已遲咗完季，仲搞到新季遲咗開始，變相令到今季賽程排到密密麻麻。根據現有安排，20/21英超賽季將會喺下年5月23號煞科，為咗唔想再俾疫情影響賽期，賽會決定更改因疫情而押後賽事嘅門檻， 已向各隊發出指引，新季下除非球隊少過14名可用球員，否則都唔可以申請將比賽延期。
同埋，為咗可按照原定賽期，賽會指出呢14名可用球員仲包括每隊嘅U21成員，只要係曾喺英超、英格蘭聯賽會屬下嘅聯賽，或海外聯賽代表過一隊上陣，都要被提升到一隊應急，即係麻煩各隊點都湊夠14人嚟開波，唔好令賽季要延期。報道仲話，假如任何球會違反賽會相關指引，個案都會交由獨立紀律委員會進行聆訊，處分由警告到罰款不等，重犯者仲可能會被扣分，以及唔會為佢哋安排重賽。
賽會咁嘅決定，除咗唔理球隊死活外，仲對一啲中小型班唔公平，本身呢類球隊只係主力聯賽戰線，成員已唔多，假如唔好彩幾名主力一齊中招，夾硬派U21球員上陣可能會令實力大減。就好似啱啱升上英超嘅西布朗，今季就只得24位一隊球員可用。相反，呢個安排對啲強隊冇乜影響，因本身陣容已預咗聯賽同歐洲賽等幾條戰線；好似今季轉會動作多多嘅車路士，已買咗六個新球員，一隊亦多達39人，加上本身青訓實力雄厚，唔少有能力嘅U21球員都外借吸收經驗，呢個安排對車仔簡直就冇影響。
再者，疫情唔係賽會可以控制到嘅事情，上月數據顯示，最少有14名職球員受到感染，當中涉及12家球會，數字上雖然唔算多，不過隨住球員陸續結束休假返英國，預料確診個案將會增加，話口未完曼城就已有馬列斯同拿樸迪兩名球員確診；曼聯中場保羅普巴亦喺上禮拜中招。雖然今個禮拜英超就開季，但賽會仍未公佈最新季前武肺病毒檢測結果，仲有冇更多職球員確診都唔清楚。