不少虛擬銀行處於燒錢狀態，「開源」是直接對策，推出高端收費版、增加部份服務費用，正是英國虛擬銀行Monzo的最新策略。
早前有人眼見銀行連續5年蝕錢，擔憂其財政問題而慌張抬錢離場，事實上，英國虛銀亦設有8.5萬英鎊存款保障，實在不用過慮。
銀行為擺脫困境，最近有兩大改變：一，向30日內於英國或歐洲地區提取250英鎊用戶收取3%費用；二，補領記賬卡收費5英鎊。銀行解釋，僅21%用戶（約84萬人）受影響，對於部份依賴現金生活的用家，只要滿足一些條件，就會獲自動豁免。
全球低息環境下，經營銀行業務，吃力不討好，選擇向部份無乜人用嘅服務收費都是理所當然，務求改善收入，提高營運持續性。講到要科水，難免令部份用戶不滿，批評是吸血銀行。
有人話，若將收費「遊戲化」（Gamified），用家會較易接受。將呢件事發揮到極致嘅，杜夫人諗起富途牛牛，買股票畀佣金好合理，話畀你知可以唔使畀，不過要每日簽到，完成唔同任務、儲積分，例如幫種子淋水、閱讀及分享財經新聞等，再用積分換免佣券及禮物，贏到幾多就睇客戶玩得幾出色。
唔少香港虛銀走Gamified的路線，好似GoSave小巴、加息券、消費後搖一搖有回贈，好玩、新鮮，略嫌未夠出神入化，獎品未夠吸引。如果話完成任務，可以免息貸款5萬蚊，或者信用卡簽賬回贈加2%，又點睇？
玩還玩，息率總有回歸正常，優惠總有做完的一日，嗰陣點收科？除咗要管控用家預期，都要考慮自身有乜服務令存戶甘願留低。
香港人好特別，以前無，𠵱家無，無所謂，但你要奪走佢以前擁有的，佢哋唔會咁易妥協，唔會咁易放過你。
杜夫人