【中環在線】噚日香港火頭處處，股壇長毛David Webb個facebook都出現一個小戰場。
事源上星期五，《星島》、《明報》同《南華早報》隨報附送一本故事書《沙族與海族》，講兩族之間互不往來，純真嘅新一代因好奇接觸對方、互相了解，最後搵到個人間天堂和平共處，似乎暗示沙族、海族代表黃、藍絲。
David Webb星期六晚即出post，踢爆策劃呢本書嘅非牟利機構「香港社區基金」，背後係知名「奶粉」、曾任林鄭月娥特首競選辦副主任黃永光。
黃永光話認為香港需要關愛、包容。Webb就直斥：「你真係想香港和諧就停咗本書。」仲點醒黃：「社會不和諧，係因為行政、立法中冇民主，大集團如信和有巨大游說力量，唔應該齋跟規矩，應該成為進步嘅力量。」黃永光聲稱係Webb粉絲，嚟緊又點拆招？
李華華