上個禮拜，美股經歷一個幾大嘅調整，有朋友打嚟問：好唔好清倉?最後，高明選擇咗瞓覺。
重申一次，喺香港買美股嘅最大優勢，就係交易時段，係你嘅睡眠時間。一個升浪嘅過程，事後睇返當然會問點解十年前冇all in買美股？但係如果有經歷過中間嘅轉折，就知其實一路持貨唔易，包括結婚要買鑽戒等理由都會令你落車。
高明曾經提出過，買股票要扑暈自己，現實應用喺港股上邊，自己都做唔到，因為每日工作需要睇住，有時刻意去食tea唔睇，偏偏pop-up嘅新聞同埋朋友致電或短訊，都會令你喺唔等錢使嘅情況下無啦啦沽咗啲股票佢。但係如果你買賣美股，簡單瞓覺已經無需理會跌幅。
疫情過後美股上升有兩個原因：一、貨幣供應大增，失去大部份儲存財富嘅功能，啲人寧願信Elon Musk吹水嘅價值，都唔信美元。但係印鈔唔係無條件會令資產價格上升，有一啲資產，例如恒指，過去十年印鈔唔升，今年3月頭再印都飛唔起，昏迷不醒，點樣用心肺復蘇都救唔醒，美股未來係咪升硬？唔一定，但至少上述兩次瘋狂印鈔，美股有反應。二、疫情之前世界係向住遙距、科技嘅方向發展，疫後加速咗呢個發展。美股名義上狂升嘅瘋狂，實際上係我哋手上持有貨幣嘅坎坷。
美股呢一刻係散水定調整，好視乎你信貨幣會繼續濫發，定央行會回心轉意尊重貨幣購買力。如果呢一刻你未買美股，高明建議你趁調整開始建倉，講到尾一股都係幾十至幾百美元，買部iPhone都唔得，落場學費成本較低。最後可能會有人質疑：𠵱家買，遲啦！高明嘅回應係：你永遠早唔過創辦人、angel、VC買股，唔行動，就永遠冇參與。
高明