阿仙奴上個禮拜六喺主場同阿士東維拉踢咗場閉門熱身賽，雖然兵工廠有隊長奧巴美揚梅開二度，但最終都係輸2:3。不過今場最大焦點反而係上季尾開始被雪藏嘅奧斯爾都有份落場，賽後「奧燒」仲喺社交媒體話新季嘅備戰已經開始，話唔定佢有機「解凍」，喺新一季英超重新上路。
今場兩隊都有主力要參加國際賽，好似阿仙奴就有格列沙加、美蘭尼爾斯同基蘭泰亞尼等代表自己嘅國家踢歐國聯。今仗維拉先由巴西中場杜格拉斯雷斯開紀錄，槍手由奧巴美揚完半場前追成1:1；換邊後客軍憑積及藍斯嘅入球再領先2:1，但兵工廠又係靠奧巴射入12碼為槍手追和2:2，可惜積及藍斯之後再入一球，個人梅開二度幫維拉贏3:2。
雖然槍手輸波，但今場都係練兵為主，而雪咗兩個月嘅德國中場奧斯爾終於再次代表球隊落場。自從6月復賽後，呢位31歲中場就冇為球隊上陣過，賽後佢亦喺社交媒體上載自己嘅比賽相，仲留言：「新球季備戰已經開始！」仲hashtag埋阿仙奴，睇嚟佢已經準備下季英超再為槍手上陣。
除咗奧斯爾復出外，今個夏天自由身由車路士加盟阿仙奴嘅韋利安，亦第一次代表槍手比賽，而上個禮拜五先宣佈再次由皇家馬德里借返兵工廠嘅中場丹尼施巴路斯亦有份落場，雖然有指佢要先隔離14日先可以比賽，但佢以精英運動員嘅身份豁免英國政府嘅隔離規定，對阿仙奴嘅備戰絕對係好事。
阿仙奴領隊阿迪達今場喺後防都嘗試吓其他球員，派咗法國小將威廉沙列巴同洛賀丁落場，不過效果就唔多理想失咗三球，防守表現同社區盾鬥利物浦時完全唔同，球隊喺英超揭幕戰就要作客「升班馬」富咸，相信阿迪達呢個禮拜喺後防方面要再落多啲工夫先得。
另外，槍手嘅北倫敦宿敵熱刺亦友賽降班英冠嘅屈福特，佢哋都輸1:2，焦點就落喺上半場為球隊把關嘅前英格蘭門將赫特（圖）身上。由於一號門將洛里斯要為法國效力，赫特有機會正選上陣，但佢上半場面對對方小將杜明高斯昆拿遠射，因為反應唔夠快令個波喺手邊入網，賽後惹來抨擊，睇嚟想挑戰洛里斯嘅正選位置，赫特仲要加把勁。