早前有網民提議將在《蘋果日報》落廣告，集腋成裘，把廣告頁面變成連儂牆，於是8月15日報紙「連儂牆」便應運而生，掀起翻報紙看廣告多於看新聞的熱潮。更令人意想不到的，是灣仔有一家報紙檔的鐵皮牆上貼滿這些廣告頁面，久違的社區連儂牆好像得以轉生重現，還被網民放上連登討論區讚揚。報販貞姐淡然笑道：「呢啲嘢係應該做嘅，只係其他檔販唔做，咪我做囉。」
貞姐的「連儂牆」報檔猶如漆黑中的螢火蟲，只有在晚上收檔才能明顯看見，白天時鐵皮蓋擱在一旁，檔口跟一般報攤分別不大。但仔細一看，便會發現塑膠擋雨膜上，有客人為她製作的A4紙大蘋果標誌，呼籲人購買報紙。飲品堆旁邊放了各式文宣貼紙，貞姐鬼馬說她每份《蘋果》都會夾不同的貼紙，有些是自行印刷的，有些則是同路人留下的。
長方形的檔口，周邊都張貼了《蘋果》的娛樂版和頭版，吸引人一邊行一邊瀏覽內容，有大叔眇一眼，扔下一句「鄭若驊，揦鮓驊」吐糟，貞姐聽罷哈哈大笑，「自從表咗態後，多咗好多生面口嘅客人幫襯，佢一埋嚟就知佢係買《蘋果》㗎啦」。
在她的檔口停留一個下午，幾乎每五分鐘便有人光顧，有年輕人，也有中老年人，「對面嗰個手足嚟，都係撐《蘋果》㗎」，貞姐喜歡以「手足」稱呼客人，幾乎認得所有客人。人們來買報紙、跟她打招呼，甚至有人留下幫忙。
一位不願留名字的小姐在檔口留了半天，她幫貞姐把雜誌入膠套、整理報紙。這位小姐對記者說：「佢得一個女人仔睇檔，真係好辛苦，又冇冷氣，有時佢去廁所，我咪幫佢收下錢，佢真係好好人。」
報檔雖不是位處遊行路線，但免不了捲入衝突位置，去年有防暴警在附近放催淚彈，貞姐不及走避，就有勇武示威者和街坊趕到幫她收檔避險。貞姐原本不敢太高調，但去年底區議會選舉之後，她從選票結果發現原來同路者眾，於是鼓起勇氣把文宣貼在檔口，漸漸認識各路戰友。
她亦試過被藍絲偷偷撕掉海報，為此安裝了閉路電視後，情況便才有所改善，「我覺得表咗態之後個人好開心，因為可以講真心說話，又唔係做錯啲乜嘢，點解要咁鬼祟呢，自己嘅政治立場唔需要擺喺地下，覺得好舒服！」
到訪當日，《蘋果》的頭版是黑色為背景色的全版廣告，「好黑呀，今日啲墨特別黑，我對手都黑晒」。貞姐賣報近三十年，入行前做時裝店，也愛做手作，報檔貨架上放的彩色珠仔手袋正是出自她一雙巧手，而沾上油墨的黑手除了忙着叠報、幫客人遞煙包、找續，還會以縐紙和鐵絲繞成手作花，送贈相熟「手足」客人，「𠵱家啲人心情唔係幾好，收到支花應該會開心」。
貞姐在1992年因為家人頂手報檔，她便順勢入行幫忙，「嗰時得一個人睇檔唔夠㗎，有人要出去拎嘢、派報紙去寫字樓，有人負責睇檔，咁就入咗行」。她認為當時是報業盛世，「嗰代人賣報紙可以做到買車買樓㗎！嗰時未有免費報紙，同埋打風時都可以加一蚊，超市、便利店都未有報紙賣」。
當年檔口在酒樓外，人人讀報紙嘆茶，自然有生意，最好景時龍頭報紙日賣50份，到了95年《蘋果》創刊後，報界競爭烈鬥，甚至激起一輪割價潮，高峯期每日賣過百份報紙是平常。她在小檔口內見證報業興衰，「見住以前有十幾份報紙，《天天日報》、《新報》、《華僑日報》、《快報》慢慢咁樣冇咗」，隨免費報紙出現，智能手機流行，人人網上看新聞，多份報紙雜誌接連停刊。
然而，8.10警方搜《蘋果》事件後，她人生首次見到有人會排隊買報紙，全日幾乎沒坐下，「飯都無時間食，食咗個包咋」，之前平均日賣《蘋果》30份，到8月11日足足賣了540多份，後來連續十多日仍平均日售200多份，還多了年輕人訂實體報紙，都是她始料不及，甚至有新界西、九龍的客人專程來光顧。
不過她慨嘆，如果要發生這種事情才發市，她寧可賣不出，「新聞自由係香港不嬲都擁有嘅嘢嚟，好似空氣咁，但𠵱家好似連呼吸都唔畀囉，我唔接受囉」。她認為香港人買報紙的行動不會三分鐘熱度，不過也沒有太樂觀，「（報紙）我諗做埋我哋呢代人啦，可能都仲有得做嘅，但唔可以淨係賣報紙」。