8月11日起，大家突然多了個看報紙廣告的習慣，歌迷F小姐（化名）則多了個落廣告的習慣。她在《蘋果》一連十日落了一則分類小廣告，寫上「姜濤不紅，天理不容」，八粒細字擲地有聲，成為網民熱話。有電台DJ都在節目中討論，連登討論區的巴絲都好奇誰是姜濤？後來F小姐再追加九日附有QR Code的分類小廣告，說要在疫潮之下以姜濤的新歌《蒙着嘴說愛你》為港人打氣。
「其實最初好簡單，我一心想登廣告撐《蘋果》，但我又唔係公司冇product要sell，想輕鬆啲冇咁政治化，就落無厘頭句子，我又想人支持姜濤，咪同細佬、妹一齊夾落分類小廣告囉，一日90蚊，一連落10日。」F小姐說，礙於版位有限，她只寫八字。
姜濤2018年參與Viutv的《全民造星》比賽勝出出道，憑其甜美笑容收服不少媽媽級fans，以往其粉絲都會自稱「姜糖」，而「姜濤不紅，天理不容」並非F小姐自創，而是fans圈內流傳已久的金句，作者已不可考。
F小姐細說迷上姜濤有千萬個理由，豈止外形、歌聲與舞技，「佢由《全民造星》出道，我哋好似睇住佢大咁，見證佢真係好努力，由200磅肥仔減到𠵱家咁樣，同埋年輕人嚟計，好少好似佢咁謙卑，咁有禮貌，我自己都有個仔，佢都未必會咁樣……（下刪10,000字讚賞）如果唔紅真係冇天理」。
F小姐笑說自己年輕時迷黎明也沒這樣瘋狂，幸好丈夫和家人都很支持她追星，只是起初兒子不太習慣，媽媽迷上一個跟自己差不多的明星，但這次分類小廣告的QR Code都是阿仔負責。首十日花了900元製作的分類小廣告帶來的討論，猶如雪球般越滾越大，還吸引其他「姜糖」提出與她一起夾份再落大一點的廣告，附上新歌QR Code連結，讓報紙再走回線上。
「估唔到咁大迴響，原來有好多人未聽過姜濤，睇YouTube留言先知好多人因為呢個小廣告而去睇佢個MV，我都好開心！」F小姐解釋，Viutv資源不多，所以過往「姜糖」都經常會自掏荷包，每當姜濤一有新歌推出，便會夾錢為偶像在港鐵燈箱登廣告、在時代廣場的大電視播新歌MV，甚至連偶像出席商場活動或小型表演，fans會自行印刷明信片，在商場內派發給途人，力谷宣傳，沒想到今次小廣告的「姜濤不紅，天理不容」猶如咒語，深印人們腦海。
F小姐笑說自己行為上算不上最瘋狂的粉絲，「我未試過去排通頂，未試過追星追到去廣州，未試過買好貴嘅相機追星」。但姜濤的歌曲曾帶她走出情緒病的低谷，回想有次哭得厲害，突然間聽到YouTube在播姜濤新歌，「跟住我就叮一聲咁諗到，我未學識跳姜濤新歌《蒙著嘴說愛你》嘅signature move，再諗到歌詞，做甜品師傅，化掉這點苦，我唔可以死住，跟住我唞順條氣就行返出去。第一次咁快可以平靜到，第一次畀啲咁虛無縹緲嘅嘢令我有番生存意志」。她想別人知道，追星不一定無聊，也讓她有所寄託。
F小姐回想自己在《蘋果》創刊已是讀者，一看廿多年到近年全家都網上訂閱，成為VIP訂戶，但已有近十年沒有購買實體報紙，因為搜報館事件重新買報，「見到黎生被人拉，又見到搜報館，睇到好心痛、好唔開心，其實我同細佬妹都已經訂晒《蘋果》同《壹週刊》，咁仲可以做啲咩呢？咁就諗到不如落廣告啦」。
她說以往實體報紙廣告與自己沒有關係，看見都只會想翻走，但國安法之下，言論空間收窄，廣告變成香港人自由表達的平台，宣洩內心不滿，「可能有啲嘢唔敢講，變咗要喺廣告曲線咁表達」。但她同時欣賞香港人的創意和不屈不撓精神，稱廣告是「一個渠道畀我去了解現今社會嘅真實情況，即係我見到銀髮族今日（8月20日）登嘅廣告，我會覺得唔係全部長者都係藍，或者唔講道理嘅，有啲都好明事理，好幫香港嘅年輕人」。
她亦感受到報紙廣告的威力，在她的分類小廣告出現的第十日，姜濤在其IG Story將廣告貼堂，還留言寫上「不為別的，只為了謝謝這一位很有心的歌迷」。F小姐沒有寫信，憑分類小廣告寄意，終於等到K（Keung）先生的回信。