無綫前藝員37歲陳積榮在今年7月證實患上肺癌第四期，醫生指最壞情況只剩半年壽命，眼前的人生路亮起紅燈，有誰會不感恐懼？性格樂天的他，不怨天尤人，感激朋友的關心，用積極的態度面對噩運，就如他不曾放棄的演藝夢，「我有睇第二個醫生話醫到機會高，當然要自己努力，點樣調節去打贏呢場仗，有奇蹟㗎！我唔會放棄。」
陳積榮日前接受《蘋果》訪問，不煙不酒的他，有否埋怨過個天？他說：「冇怪個天，我反而調轉，呢段時間好感恩，好感激好多朋友，一啲就算唔識嘅人都會幫我。」他更依足醫生吩咐，每日出外曬太陽，做簡單運動，保持正向思想，他相信會有奇蹟。「我有睇第二個醫生，話醫到機會高嘅，但當然要自己努力，呢段時間心境、壓力、身體，點樣調節去打贏呢場仗，有奇蹟㗎！醫生都有同我講，有完全康復嘅例子，所以我都唔會放棄。」
不放棄的還有一直追尋的演藝夢，陳積榮大學畢業便投考無綫藝訓班，但一直只做行行企企角色，同一處境劇可以無限次換角色出場，他覺得可以學到嘢：「呢個係TVB特色，你話好好人工就唔係，可以維持基本開支。」合約過了三年之後，他選擇離開：「當時後生覺得機會唔係太多，出咗嚟發現呢個世界好大，好多人都好勁，有更加多嘢要學，要增值自己，先可以喺呢一行生存。」
離開無綫輾轉過HKTV拍劇，可惜未獲發免費牌，陳積榮就試過兩年沒有收入：「我咁耐都冇離開呢一行，就係因為鍾意。」機緣下他到內地拍網絡電影，並開始其創作之路，自資拍了三部近乎「零成本」的電影：「一開始梗係冇budget，拍咗幾部電影。曾經收過朋友鬧我，話『你拍乜垃圾出嚟，你咁嘅垃圾，都當自己電影呀，大導演呀？』我都知口水戲、屎尿屁，玩啲無聊嘢，所以我更加想拍一部好嘅電影，要拍正正經經有製作嘅電影，最少要代表我作為演員嘅心聲，我想呈現嘅嘢。」
由去年初籌備拍一部關於訓練班的電影，問到讀訓練班是否捱得好辛苦？陳積榮說：「一定辛苦，我相信每個經歷過訓練班嘅演員，都一定明白嗰種辛苦。」原本已找到投資者籌措部份資金，但疫情令工作停頓，如今他還要治病，無奈要將夢想暫時放下。
陳積榮透露現已開始做電療：「辛苦㗎，我都瘦咗8磅、10磅，頭兩日以為冇事，後面嗰幾日唔舒服，五日嘔咗三日。」自拍片講患癌後，他收到不少人在金錢或物質上主動支持：「最深刻一次，有個我唔識嘅人問住邊度，佢專登嚟同我傾偈，原來佢有同樣經歷，佢送咗張支票畀我，我覺得都唔係最大件事，突然喺架車拎咗盒花膠畀我，我反而覺得真係好多有心人。」他說起時忍不住眼泛淚光。
撰文：嵐山
