利物浦上禮拜六踢咗英超開鑼前最後一場熱身賽，因正值國際賽檔期，陣容唔完整下對住英甲嘅黑池半場竟先失兩球，好在之後靠祖爾麥迪比、沙迪奧文尼、羅拔圖法明奴、哈維艾利洛、南野拓實、奧歷治同薛比雲丹貝治各入一粒，以7:2反勝。
不過紅軍同日亦收到壞消息，據報今夏新援希臘左閘森美卡斯，返國家隊報到對武肺檢測呈陽性反應，聽聞仲發燒需接受隔離。至於同紅軍只剩一年合約嘅荷蘭中場韋拿杜姆，有傳同巴塞隆拿傾掂咗個人條款，由於紅軍知道留唔住佢，所以已同巴塞講只要出到1,500萬鎊就可帶佢走，不過巴塞就希望減多500萬鎊，而一直傳緊係韋拿杜姆代替品嘅拜仁慕尼黑中場堤亞高艾簡達拿，日前受訪時竟然話：「從來都冇同任何人講過要離隊，每年傳媒都將我同唔同嘅球會扯上關係。」佢仲話拜仁就係佢屋企，根本冇諗過要走，睇嚟紅軍未必簽到呢位西班牙國腳。