政府抗疫不力，武漢肺炎至今仍未斷尾，令港台王牌節目《城市論壇》自上年11月24日後至今連續41個星期、超過10個月未重返維園開壇。《城壇》主持「蘇B」蘇敬恆噚日中午12點就一支公重返老地方，暑假後開壇，主題係「論壇主持回維園 普及發聲匯百川」。
蘇B話噚日原本應該好多人投緊票，但政府因疫情宣佈押後一年，慨嘆《城壇》7月做暑假前最後一集節目，正正討論緊立法會選舉，估唔到世事變化咁快。
蘇B透露重返維園做網上直播，係想為大家熱吓身，話因應疫情同限聚令，佢估計《城壇》未來一段時間都唔可以喺維園做節目，但因為佢真係好鍾意維園，尤其懷念維園平時用嚟做節目、目前已被封嘅音樂亭，所以趁新一季節目開始前返維園畀大家感受吓自由空氣。
由於預計《城壇》未來一段時間難以設立現場觀眾，節目已經特別設立電話專線畀巿民發言，呼籲大家下星期致電9032 4566呢個號碼，港台嘅工作人員就會安排進行視像發言。蘇B期間又展示一條1.5米長嘅道具間尺，話大家要保持社交距離，「但發言無界限，視像齊表達」。
今年係《城壇》40周年，蘇B強調節目40年來都希望可以喺開放環境空間下，畀大家毫無恐懼咁樣表達諗法，《城壇》近月一直同康文署同維園聯絡，希望早日返去音樂亭做節目，話除咗普及檢測，「論政都應該普及」，呼籲市民下星期日中午12點喺港台電視31睇新一季《城壇》直播。
李八方