譚炳文與李香琴自上世紀60年代尾開始合作無間，更在70年代試過合組公司，後來再於電視台聚首。由於經常孖公仔出雙入對，外界即傳兩人相戀，惟當事人一直以好友關係相稱。琴姐曾於訪問中透露與炳哥關係：「我哋唔係拍拖，但有感情，大家合作咁多年，點講都會有感情，好多宴會都會請我哋一起出席，佢又唔肯帶太太去，所以人哋就將我哋當成情侶。」琴姐曾認對炳哥有感覺，而有感覺有助合作交流，且因經常見面，一定會有流言蜚語。
雖然兩人感情關係疑幻似真，但幾年前炳哥接受商台《一圈圈 星光背後》訪問時，被問到炳嫂曾否呷琴姐醋，炳哥當時輕鬆回應：「緋聞，我做呢行唔理人講咩，唔知佢（太太）呷唔呷，佢呷又好唔呷又好，都幾十年，呷乜鬼呀！」事實上琴姐早在2012年在家中跌倒後，健康每下愈況，更有指患上腦退化和高血壓，兩人最後一次見面是4年前，炳哥稱當時琴姐已經「唔係好認得人」。
