「傷了的女人，別走這樣近，被人拋棄的女人，殘忍……」這兩句歌詞很代表林雅詩。早前被爆男友兼經理人偷食身邊女助手，一直蒙在鼓裏的林雅詩晴天霹靂，事後出席活動時手上帶有護帶似遮傷痕，最近又在facebook貼出黑白照，疑似用紅酒送安眠藥 ……
仍有心情和時間出帖，應該不會真的出事，「唔知自己po咗啲咩，因為我要食安眠藥瞓覺，可能又大懵溝咗少少紅酒，所以有少少思緒混亂，嚇親大家！」這天，林雅詩左手的傷痕仍在，「又唔可以話係𠝹手，係自己唔小心發脾氣整到！」
42歲的林雅詩說，拍過三級片，幾乎一世也帶住三級片女星個名。當年扮演的援交少女，今天已是個單親媽媽，為生活煩惱的失婚中女，「呢排好大壓力，生意差（時裝店）、娛樂事業都停晒，仲有屋企想stay喺香港定離開，加上自己感情問題，好多方面都令我好大壓力！」
前夫和男友都有外遇，「可能我聽日死咗呢，做人好化學，今日都唔知聽日事，聽日分分鐘唔知有乜意外，所以唔好諗咁長遠！」傷痕纍纍的林雅詩說。
撰文：文嘉龍
攝影：郭賢興
最近偷食新聞特別多。林雅詩的故事是，她的助手暗地與自己男友兼經理人有染，而且更有個兩歲兒子。幾個月前這單新聞爆出之後，林雅詩才如夢初醒。對拍拖三年的男友兼經理人馬天樂的愛恨，林雅詩說：「我由嬲轉到已經冇乜感覺，之前真係好嬲好𤷪𤺧好唔開心，覺得自己好蠢，𠵱家已經冇乜特別感覺。」
跟隨自己多年的女助手原來是小三，「我覺得好恐怖，因為呢個小三係助手身份，一路工作緊有個女人喺隔籬，原來同你最親嘅人有關係，佢仲可以若無其事，畀我真係一定唔得，我係『醋埕』，畀着我係佢，一係我唔會出現，一係就會畀啲顏色我睇，我覺得正常，係會有呷醋一面，做女人都會有敵意啩，但佢若無其事先恐怖囉！」
林雅詩說，小三事後曾經約過她出來見面，「一堆廢話，我覺得好離譜，佢話佢哋發生呢件事，係因為我同馬生有拗撬嗌交，所以成就咗佢呢件事出嚟，佢竟然可以同我講，就算有呢個小朋友，都係我造就呢樣嘢，我送呢個禮物畀佢。我聽完覺得好恐怖，做女人係咪要咁呢？我唔知呀！」
感覺被身邊最親的人出賣，不是第一次。2015年林雅詩的老公溫文英，同樣偷食斷正，被傳媒拍下和另一女子當街啜爆，終於離婚收場；今次這段三年情，又是男方偷食，「我真係好hurt，可能由細到大我喺感情方面，其實都好渣，我會好唔開心，點解我每次拍親拖都係咁唔開心，結果都係唔好！好似我同前夫都係離婚，跟住諗住有一個新感情，我好重感情，所以會更加hurt！我只係想有人錫我啫，我唔係要求好多嘢其實，我只係想搵一個真係錫我嘅人，其實就足夠。」
兩次感情重傷，林雅詩說：「正常係前夫傷啲，因為我哋真係結咗婚，有埋小朋友，但係今次嘅傷，我覺得成件事好似好多人呃我，因為估唔到一啲咁close嘅人，我一啲都察覺唔到，更加傷囉呢次。」
2005年林雅詩嫁給富二代老公溫文英，以為可以在家相夫教子當少奶奶，但她忽然在2015年「復出」拍寫真再戰娛樂圈，其實那時候兩夫妻的感情早現裂痕，林雅詩才要「拋返個身」復出。在娛圈浮浮沉沉，林雅詩近年經營時裝店為副業，不過又因為疫情打擊，兩間舖的收入大減。
「呢個疫情更加差，你諗吓我哋成間時裝店嘅生意額得三位數字都試過，得幾百蚊，好得人驚成件事！我哋賣衫唔係必需品，所以都明白點解生意跌咗咁多，但係明白歸明白，都係要揼錢出去支撐住，上水舖頭比較貴租，差唔多六位數字租金，商場又唔肯減，人工我哋一定會出到，但係租金比較擔心，再捱唔住都係要close，𠵱家都係未知之數！」
都是為搵食為生計，正如當年林雅詩拍下不少三級片，也是為了搵錢，「係呀！我記得當時我喺外國返嚟，參選咗港姐（1997年）落選之後，叫做拍第一套三級片嗰時都掙扎咗好耐，不過細個唔係好識諗就拍咗，嗰時諗住搵快錢拍三級片，一來知名度啦，同埋好現實可以搵到錢。因為我細個好記得已經唔使靠屋企人，由細到大我都比較自立，有乜我都唔會去求屋企幫手，都係靠自己努力去爭取！」參選港姐前，林雅詩的父母決定離婚，令她知道更加不可加重母親擔子，「選港姐之前我爹哋媽咪啱啱離咗婚，嗰時我喺英國讀書，所以覺得自己更加要努力要自立，唔想媽咪辛苦照顧我同我細佬，我要更加快出嚟呢個社會做嘢，快啲搵到錢！」
三級片盛行的年代，當中林雅詩接拍的《邪教檔案之末日風暴》其實只屬IIB級，不過她在片中有露點鏡頭，而與古天樂的床戰亦演出大膽，「其實我唔係拍過好多套（三級片），有啲表面係三級片，我啲朋友同我投訴都冇嘢睇，佢話封面就好似好勁！其實我統計係拍咗三、四部㗎咋，唔係講到咁多囉！」
多年以後，別人提起林雅詩都總是冠以三級女星之名，林雅詩說，現在其實很介意。「嗰時真係唔係好介懷，後生吖嘛，但係𠵱家比較介懷，因為有小朋友，有小朋友就唔係好想提，其實真係有後悔過！嗰時有人問我有冇後悔，我話冇，但係𠵱家問我，講真我有後悔過，因為真係唔想自己小朋友提返，雖然𠵱家社會係好open好開明，但係我都會有啲後悔去揀咗呢條路，因為好多人都係會標榜三級片女星、艷星之類，我點樣努力去改自己形象，比較正面嘅戲路，都會俾人感覺諗返以前三級片，所以諗返𠵱家會後悔嗰時做過囉！就算我自己都唔會睇返我以前啲戲，重播我都唔睇，因為我唔想睇返自己啲嘢！」
林雅詩與前夫所生的兒子，今年快將15歲了，現正在外國升學，「就算佢喺香港都係讀國際學校，啲人唔係好認得我，當然我去學校唔係咁樣着啦（低胸），都係一個普通媽咪，一個好師奶嘅形象，但係我自己形住會睇唔起自己，覺得會唔會累到個仔呢？但係好多嘢冇得返轉頭啦已經，所以個心會好唔舒服！」
和老公離婚了，但林雅詩說，夫妻感情還夫妻感情，父子感情還父子感情，兩父子至今依然不時有聯繫。說到贍養費問題，她說前夫有照顧兒子的升學費用，「我有個小朋友喺外國讀書，就算我前夫會照顧佢，都有好多其他費用，總之養一個小朋友幾貴㗎，仲有我自己呢，所以都會有壓力！（叫前夫畀錢？）唔會喇，我都知佢好盡力，我靠自己囉，真係唔掂先再諗囉！」
當上單親媽媽的這幾年，林雅詩覺得最困難是面對搵食和照顧的兩難，「Single mom最辛苦就係咩都要自己解決，不過好彩有我媽咪幫手，但係都唔可能成日要靠屋企人。我有好多嘢要諗，如果我放晒全部時間照顧佢，我就做唔到嘢；如果我全部時間做嘢，我又好似冇咩時間陪佢喎，好進退兩難所有嘢，我好掙扎，好彩有我媽咪照顧，所以我可以叫做全力去做嘢！」
回想與前夫離婚後為爭兒子撫養權而鬧上法庭的往事，是林雅詩的痛苦回憶，「一個好親密嘅人，突然間去到要鬧上公堂打官司，使好多錢打官司去爭一樣嘢，我覺得點解要去到一個咁嘅地步，就算唔一齊唔緊要，係咪一定要去到呢個地步呢？大家都受傷，大家都唔開心，大家都受傷去爭我個仔嘅撫養權，爭完，大家都付出咗咁多時間金錢同埋痛苦，結果係咪大家想要呢？係咪我爭贏咗，我好開心呢？梗係啦，我個仔喺我隔籬，但我個意思係過程令到大家包括我屋企人、朋友，佢嗰邊嘅屋企人都好痛苦。爭緊嗰時諗辦法點樣去challenge對方，唔知點解搞到大家都擘晒面，我覺得好難睇！到𠵱家呢一刻，佢哋（兩父子）又可以維持返，更加好似白做咗中間嗰一part我覺得好痛苦，做人其實應該好簡單就好OK，所以𠵱家我唔會諗到好複雜。」
傷了的女人，對男人還有信心？「我都話由細到大我都好簡單，我想有人錫我，就係咁簡單，但連呢個咁簡單嘅嘢，都好似冇可能發生，我係會好唔開心，所以都會有失信心㗎！我成日同自己講，要自己撐住同要靠自己！」撐得一日得一日呀！
林雅詩參選港姐那一年，同屆的冠軍是翁嘉穗、亞軍是李明慧、季軍是佘詩曼，林雅詩則二十強止步。當年的港姐，如今是facebook friend，「facebook大家都有聯繫，李明慧我撞過幾次，大家都OK，不過唔會成日聯絡，大家睇facebook都見到！」
facebook事，facebook了，真正是林雅詩圈中好姊妹的，原來是張文慈，「佢真係一個好好嘅姊妹，佢帶我入教會，嗰陣時我好煩，情緒都好有問題，跟住係佢帶我入教會。我搞離婚嗰時，佢一路陪住我，有啲乜就同我傾，佢覺得有乜嘢事就要即刻去搵佢，或者佢同我祈禱，所以佢係一個好好嘅姊妹，好錫我。」
暫時未有男人錫，搵個閨密頂住先！張文慈都傷過，大家都是有故事的人，啱嘴形。