【本報訊】通緝犯──一個聽起來像犯下彌天大罪的稱號，跟眼前一臉稚氣的小伙子，感覺完全扯不上關係。年僅18歲的劉康未拍過拖，未飲過酒，連紅燈也不會衝。
劉康給記者的第一印象，是一個溫文腼腆的大男孩。他說話輕聲有禮，總是重複着「唔該晒、唔好意思、麻煩晒」。訪問完送他到車站的一段路，記者與他閒談，問他有甚麼興趣，頗為寡言的他只答「都係打機睇書嗰啲」，一句起兩句止，不過提起喜歡的哲學家，卻忍不住連珠炮發：「我最鍾意John Stuart Mill、Jeremy Bentham、John Locke、A. J. Ayer，佢哋全部都係英國人，所以我都好鍾意英國呢個地方。」
初來報到，習慣英國的飲食嗎？「都慣啊，因為我係素食者，平時都係食薯條、薯餅、豆類嗰啲，同呢度嘅食物差唔多。」英國人出名愛喝酒，但原來已屆合法飲酒年齡近一年的他，仍未嚐過一滴酒，「因為冇機會遇到飲酒嘅場合」，說罷他沉默了一會，又好奇地問，「咁你覺得咖啡定酒好飲啲？」
此時我們正好途經一間英式酒吧，記者提議飲杯啤酒：「你自己試吓咪知邊個好飲啲囉。」他卻急急拒絕：「都係唔好喇！如果試過覺得好飲，返唔到轉頭點算？」
隨後我們走到馬路口的紅燈前，記者見沒有車便過了對面，回頭一看，劉康仍乖乖待在原地等候，良久後轉綠燈才走向記者說：「唔好意思要你等，因為我仲申請緊政治庇護，唔會做唔合法嘅嘢……不過其實我喺香港都唔會衝紅燈。」
雖然訪問過程只有短短兩個小時，但跟劉康相處，最深刻的感覺是他堅持自己想法，正直單純的個性。只因生於亂世，被不公義的政權扣上罪名。年紀如此輕，仍猶如一張白紙，許多事未曾嘗試，還望孤身漂泊後，有一天能如他所願，回到香港，跟家人朋友一起經歷更多人生美好的事。