堅決不肯道歉的女人，如常屙屎唔出賴地硬，大言不慚「呢個病毒非常狡猾」，直頭邀請市民踴躍參加駁嘴比賽，連一位平日溫文爾雅的朋友也忍不住發聲：「仲使你講！不過隻病毒再狡猾，都冇你隻毒婦咁狡猾。」風水佬呃你十年八年，此嫗鬼拍後尾枕，立時三刻自己奉上狡猾的鐵證：「佢不斷咁變化，所以各國政府喺應付時都要不斷總結經驗，不斷完善，將疫情影響減到最低。」哎呀阿嬸，乜你講嘢內容跳嚟跳去，毫無邏輯可言㗎？究竟籠統的「各國政府」係張三定李四，請清楚列出名單，好讓大家fact check，而且也請緊貼主題，玩意識流都要有紋有路先至令人信服㗎，唔該參考維珍妮亞胡爾芙吖。 既然話係「總結」，表示已經蓋棺論定，點仲有得採取現在進行式，「不斷總結」咁兒戲？譬如近日開庭的少女全裸浮屍案，專家除了提出確鑿科學證據，質疑死者溺斃的假設，還說不論真的浸死抑或死後被推落海，全裸本身根本便不尋常，講到咁斬釘截鐵，難道還要繼續不斷總結？
與其天花亂墜東拉西扯，不如保持緘默，起碼姿態比較瀟灑。新西蘭基督城那個跑到清真寺屠殺五十一人的極右狂徒，審訊時拒絕辯護律師輔助，一支公站在被告席，聽完受害者家屬控訴，結果放棄為自己辯白。嗱嗱嗱，呢啲就叫高尚情操嘞，雙手斑斑血漬全世界有目共睹，縱使天堂留咗位，都唔好意思將隻屁股塞入去啦，最後審判這種血債血償的清算大會，全知的上帝唔通色盲到黑白不分，聽完你指白為黑，就一疊連聲哦哦哦？