上星期六金融時報周末版有一篇報導說三藩市樓價租金昂貴，年輕白領難捱，苦不堪言，怎知道一場大流行疫情，改變了居住習慣，令三藩市多年來有升無跌的樓價和租金，即時向下調整。
看過報導，正想向三藩市朋友問個究竟，手機響起，卻是三藩市老友K來電，大家已有很多年不見了，也未有通訊，這個時候來電，着實事有湊巧。老友K說：「聽說香港人資金外移，會不會移來三藩市？」左丁山說：「三藩市甚麼都貴，點會移去三藩市，有乜好搞作？」老友K云：「一盤金融生意年賺一百多萬美元，大股東年過70，有意賣盤退休，三四個小股東也是老人家，見狀也想一併出售股份，即是全盤生意頂讓，你有無興趣或介紹投資者？」送來一煲冇米粥，點煲落去呀，依家又唔過得去三藩市實地觀察做DD，真係得個講字。同老友K講講吓，見係40年老朋友，畀條計仔佢：「咁啦，你問吓美國移民局、移民律師、香港買家可否當係投資移民計劃，買咗之後，唔炒現有僱員魷魚，保就業，於是買家可以成為移民攞綠咭，如果得嘅，或者有人有興趣。」老友K話一言驚醒夢中人，會立即去搵移民律師度橋！乜唔係啫，中東半島電視台報導塞浦路斯賣Golden Visa，每位要投資二百五十萬歐元，買家可成為歐盟公民，已知賣出五百份，買家多數係中國人，最出名嘅就係中國富婆楊惠妍（碧桂園太子女），現時投資移民行業成行成市，最受中國有錢人歡迎。
唔講冇米粥，問老友K三藩市現況如何？佢話三藩市年輕人大量移居出走，最受歡迎目的地係Lake Tahoe，嗰邊樓價比三藩市樓市平好多，Lake Tahoe買樓，因按揭利率低，每月供樓銀碼平過三藩市月租，此地離開三藩市約三小時車程，以前根本不可能到三藩市返工，但現在人人在家工作，Google說明直至明年七月，Twitter宣佈職員可永久在家工作，BlackRock市內辦公室空無一人。因大流行疫情帶來之大變動，相信影響深遠，科技網絡、互聯網、雲、遙距通訊軟件如Skype、Zoom皆令市中心（CBD）呢個傳統概念崩潰，新冠肺炎風暴令人群聚集不可能，城市餐廳停業……老友K最後講：「千祈唔好買美國商業大廈收租股！」