話說撐警藝人楊明上月初涉醉酒駕駛撞毀一段超過80年歷史嘅三米砌石牆，曾經有人估計楊明要賠成25萬維修費，但實際上政府點樣追數呢，噚日中西區區議會就搵政府部門同大家交代下。但政府似乎唔多着緊，區議員要求政府「原汁原味」重建之餘，仲要向楊明追返維修費條數。
點解八方話政府似乎唔多着緊？因為中西區區議會要求咗五個政府部門出席會議，包括古物古蹟辦事處、路政署、警務處等，原本個個都回覆話唔去，最後只得路政署派咗人去，其他部門影都無。
路政署話石牆嘅修復工程喺8月27日已完成，仲話已經保留咗大部份原本嘅石塊，但民主黨甘乃威話路政署做呢類工程一向揦西，要求「原汁原味」重建，亦有議員關心維修費用，同埋邊個畀錢。路政署又話按既定機制，估算完維修費用後就會向涉事司機發信，詢問會唔會繳交款項，如果事主唔肯畀就會再向警方查詢睇法，然後問法律部門下一步行動。
路政署講完大堆嘢，即係原則上要楊明畀維修費，但收唔收到又另一回事！但中西區區議會就唔理咁多，一致通過動議要求路政署用「原汁原味」重砌石牆，同埋並依法向楊明追討維修費。