噚日係壹傳媒創辦人黎智英恐嚇《東方日報》記者案裁決日子，唔理黃定藍嘅市民必定睇實手機等裁決出爐，就係咁緊張時候，有網民發現《星島》網快人一步出咗即時新聞，條題仲係「黎智英涉刑恐記者 裁定罪成」，有藍絲開心到即時喺討論區開post慶祝，但好快有網民發現，呢單係《星島》「獨家」，因其他傳媒冇報，最神奇係，原來當時法庭仲未宣判！《星島》就先自行宣判肥佬黎罪成！
話說《星島》網下晝2:35出呢單新聞，登出一分鐘之後，即刻有香討網民開post轉載報道，仲轉貼連結，旋即引嚟大批藍絲網民熱烈討論，有人支持「即時監禁」，但開心唔夠一陣，有人發現段文被鏟走，到下午3點左右各大傳媒都報道罪名不成立，搞到成班藍絲冇晒癮。樓主話想改標題但改唔到，只有沿用「黎智英涉刑恐記者 裁定罪成」呢個討論標題。
今次《星島》搞到成班藍絲炒車，傷害佢哋嘅心靈，八方一於致電《星島日報》行政總裁兼總編輯黎廷瑤，問問點解有篇咁嘅報道，點知黎廷瑤話第一次得知呢件事：「咦，係咩，係咩？我都唔知喎！我再去了解一下先。」到底呢篇裁定罪成嘅文章點樣出現、消息從何而來呢？都係等《星島》慢慢研究。
李八方