講起馮煒光做廣播處長，一位傳媒老友話唔好嚇死佢，左丁山大笑：「藍絲傳媒人還有阮紀宏、屈穎妍、潘麗瓊夠出名，啱唔啱聽？」傳媒老友好認真咁講：「你唔好噏得出就噏，我認為邱騰華要做戲做得似樣，唔會搵太過深藍嘅人士做廣播處長嘅。三位大哥本來好有資格，陳志雲、羅燦或趙應春，可以壓場喇啩，獵頭族唔搵佢地就係失職。」「唔似囉，趙應春已被委任為港台顧問委員會委員，照計唔會考慮。羅燦性格強，唔易聽外行人對佢指指點點，在林鄭邱騰華眼中，羅燦嘅『安全系數』唔夠高。陳志雲呢？佢點肯聽邱騰華點佢？」老友話：「你講得未嘗無理，今時今日，特區政府已狠下決心，配合西環指令，要整頓傳媒，港台全由政府話事，呢一次搵處長，一定係政治第一，專業第二。就算搵前任副廣播處長吳錫輝做處長，吳錫輝都要應承政府若干條件先會獲聘。吳錫輝不如享受飲食好過啦！」「還有甚麼人呢？」老友講：「我諗起一位不算冷門，賠率會有五至八倍嘅人物，就係前商台新聞總監陳淑薇，佢跟林鄭識咗好多年，林鄭好畀面佢，佢亦對政府高官以禮相待，獵頭族一定搵過佢，如果May姐肯應承，林鄭、邱騰華唔會反對啩？」
猜謎估馬膽，通常好危險，就此打住。唯一可以肯定嘅，就係特區政府正在對香港傳媒，不分中西，收緊羅網，一個星期內先後拒絕洋人簽證。Hong Kong Free Press聘請一位愛爾蘭記者來香港做編輯，攞唔到簽證！香港大學新聞及傳媒研究中心邀請美國普立茲獎得主到港大任教一個學期，該記者受入境處「問50條問題」，索性取消來港，港大新聞及傳媒研究中心由陳婉瑩創辦，一向注重與西方媒體聯絡（現在可能係勾結），經此打擊，以後西方傳媒報導香港新聞自由一定係distrust and verify，對香港國際形象，不是好事。與此同時，港大社會科學院亦有消息人士傳出，外籍教授接到學系管理高層溫馨提示，在課堂上講書或者Zoom，要小心話題及用詞。詳細情況不用多講嘞，社會科學院係港大講最多時事、社會、政治、文化、地理嘅地方，呢類課題有甚麼禁區？教授自己諗，聽聞有外籍教授嘆息academic freedom係咁先，以後照本宣讀就算，唔會搞多餘課堂討論！