恒指今日收市後換馬，有戰友問到，阿里（9988）、小米（1810）、藥明（2269）染藍，新經濟股比重大增，會否令下周恒指走勢改觀？魏力睇法剛好相反，三股自染藍消息公佈後大升，投機者自然好消息出貨，短期易跌難升之下，反而會令恒指舉步維艱。
手握呢三隻股咪好濕滯？想短線減壓，一係減半持股，一係就買些少舊經濟股，博科技股回調時，會用傳統股托市，例如本地地產股、中資金融股，以至最低殘的滙控（005）、中移動（941）。呢幾類股普遍仍在低位，恒指今年累計仍挫1成，遠遠跑輸歐美以至內地股市，現水平要再單邊大冧亦不容易，最大可能係科技回，傳統股彈，將恒指穩定在100天線之上，因此買恒指熊仔、反向ETF去博，現水平勝算亦不高。
美股方面，美滙、債息低位反彈，利好傳統股如銀行，不利金屬資源、科技股表現。值得留意，美股近日與VIX同步向上，情況罕見，反映有大戶開始為跌市作部署，買點VIX相關產品作對沖持貨，不失為穩健策略。
筆者為證監會持牌人，未持有上述股份財務權益
魏力