關於美斯想離開巴塞隆拿嘅風波，相信都會講足成個月，最新消息就係美斯老竇已乘私人飛機由阿根廷去到巴塞，周三同巴塞會長巴杜美正式講數，佢到埗後簡單回答在場記者，講到明阿仔已好難留喺巴塞。隨即亦有英媒爆料，話呢位阿根廷球王已經同曼城傾好個人加盟條件，同意簽署一份總薪酬達6.23億鎊（約64.6億港元）嘅5年天價合約。
美斯老竇抵達巴塞後，即有西班牙媒體Deportes Cuatro記者向佢提問，佢就好簡短咁答話唔知美斯係咪會離開，但又直言阿仔已經好難留喺度，只係話自己冇同任何球會傾過美斯嘅轉會。吹水最叻嘅《太陽報》就話美斯同曼城已經私下傾掂數，簽約後周薪會高達240萬鎊（約2,490萬港元），換成時薪嘅話就係14,200鎊，每秒計都有成41蚊港元，仲高過香港最低工資時薪，所以除咗肯定係史上最高薪運動員，仲比所有其他「同行」都高出起碼近兩倍。
之前都傳過，話美斯去曼城其實亦都係鋪路退休前可以去美職過吓癮，賺多一筆錢就收山，所以報道都有話美斯同曼城簽嘅呢份五年合約，實質係一份「3+2」合約，先效力曼城三年，之後就會轉投同屬城市足球集團（CFG）嘅美職聯球隊紐約城，據報佢仲可以獲得CFG部份股權，認真和味。
家陣美斯同球會最大分歧就係點樣「分手」，皆因合約入面有條款係喺6月10日前知會球會，就可喺今夏自由身走人，但因為限期一早過咗，代表美斯嘅法律團隊就堅持因為武漢肺炎大delay，所以唔承認呢個限期，而巴塞方面就得到西甲賽會支持，堅持有球隊要撬走佢，就點都要付上高達七億歐元嘅贖身費。總之呢單風波搞到球隊上下立立亂，中場法蘭基迪莊亦講到明咁樣落去對球隊唔係好事：「目前好混亂，有太多奇怪事情發生。我自己冇同美斯傾過，亦冇同球會傾，老實講唔知會點；但美斯家陣仲喺巴塞球員嘅WhatsApp群組入面，我希望踢完國家隊返嚟後，仲會見到佢，但唔到我話事。」
睇得出迪莊講得好隱晦，唔似蘇亞雷斯或維達爾咁擺明撐美斯居多，原因係喺荷蘭籍新帥朗奴高文上任後，呢位高文同胞一定唔會失寵，仲隨時可能做埋隊內大佬。相反，高文就繼續清洗好似阿蘇同維達爾呢班已唔喺佢計劃內嘅球員，當中拿傑迪錫日前已經正式返咗西維爾，而維達爾就據報同國際米蘭都傾掂個人條件，會以外借形式效力一年先，再睇藍黑軍團買唔買斷；至於阿蘇嘅最新潛在買家就係祖雲達斯，傳佢都同斑馬兵團達成個人協議，問題就要睇巴塞係咪肯免費放呢位仲有一年合約嘅前鋒去意甲，如果唔放佢走又唔用佢，到時要繼續畀巨額薪酬，蝕底嘅一定係巴塞。