法甲豪門巴黎聖日耳門（PSG）禮拜三宣佈，陣中有三名球員確診感染武漢肺炎。據法國《隊報》報道，三名中招嘅球員包括巴西球星尼馬，其餘二人分別係同為阿根廷籍嘅「天使」迪馬利亞同埋里安度柏利迪斯。
PSG喺禮拜三發表嘅聲明入面確定有三名球員感染病毒：「三名PSG球員喺接受檢測後確定受到感染，相關人士都已接受適當嘅健康治療。喺未來幾日，PSG所有職球員都會陸續接受檢測。」PSG喺上月創球會歷史首次打入歐聯決賽，面對拜仁慕尼黑最終輸0:1。球隊亦因為要應付歐聯賽事，獲法甲賽會特准延後展開20/21球季聯賽賽事，原定首場比賽會喺下禮拜四進行，作客出戰朗斯。PSG早喺禮拜一已宣佈陣中有兩名球員確診，嗰陣就冇透露中招球員嘅名。
法媒《隊報》報道，三名感染武肺球員中，包括人氣最高嘅巴西球星尼馬，其餘兩人分別係翼鋒迪馬利亞同埋中場里安度柏利迪斯，三人喺歐聯決賽後都去過西班牙伊維薩島度假，各自同友人玩番轉，𠵱家已全部返番法國報到，佢哋會接受為期至少一個禮拜嘅隔離同觀察。
新一季法甲喺上個月已經展開，喺過去幾個禮拜都出現唔少球員確診個案，包括馬賽、里昂、南特、蒙彼利埃同埋斯特拉斯堡，其中原定喺上月21日上演嘅揭幕戰馬賽對聖伊天，亦因為前者出現多名球員確診搞到要延期。賽會因應疫情作出嚴格規定，若球隊喺8日內出現4宗或以上感染個案，就要被禁進行集訓。