有人話非住宅物業減辣可以救返工商舖，而我仍然睇到工商舖「笨豬跳」下滑。寫字樓跌得勁慘，最近上環信德中心呎租29元，見10年新低，比起兩年前高位80元低逾六成，重點講3次，係兩年前、兩年前、兩年前。還有中環中心、美銀中心的呎租都見逾10年新低。有人話外資撤離，中資頂住，一名早年高位接貨的投資者聽完就回應：「頂你個肺！」
我有位大孖沙老友有個工廈項目打算今年推出市場，但疫情一波未平，一波又起，由原本延遲至今年中，現在一再推到明年首季後才推出市場。另一個業主今年初低調拆售觀塘工廈項目，就算開價比較一年前由林子峰拆售的觀塘創匯廣場低價一成，仍然毫無起色，5月說要「圍飛」結果是圍不到。
林子峰拆售的創匯廣場呎租由去年底高位26元，在鬥劈後低見15元，跌幅42%。舉例一個建築921方呎單位當日以約1,000萬元買入計，現時收租1.5萬元，回報率不足兩厘。租金跌，價位係咪跌？在現在指鹿為馬的年代，我唔識答。但非住宅減辣正正反映目前工商舖市場勁慘淡，老練的投資者話寧買當頭起，勿走去撈底，從來只會越撈越低。
小師兄