特首林鄭月娥早喺今年6月出席行會前記者會時，已經公然狂踩政府「底褲」銅芯口罩，話呢個口罩「麻麻哋，可能洗得多鬆咗」，噚日現身行會前記者會時，佢又搵咗另一個原因即場離棄呢個底褲口罩。
話說777噚日朝早身先士卒，帶同官員接受武漢肺炎檢測後，企喺一塊有至少10個人身位咁長嘅巨型棉花棒螢幕前發言，其間見佢不時用手搞口罩條繩。其後佢俾記者問到係咪因為政府唔受歡迎，搞到咁少人登記做全民檢測時，終於忍唔住除罩，再嘗試戴返，更一度好尷尬咁講：「希望啲攝影（記者）唔好係咁影我好唔好呀？」仲投訴個口罩可能緊得滯，向主持記者會嘅特首辦助理處長（傳媒）姚繼卓求救，問佢有冇多個口罩畀佢換，話唔知點解個口罩唔得喎。
早前喺記者會上突然暈倒嘅女副官陳嘉怡見狀，即刻攞個外科口罩諗住畀林鄭，點知林鄭話自己其實唔使戴口罩，因為佢同記者嘅距離超過1.5米喎，陳嘉怡只好返轉頭收埋個口罩。但如果777覺得同記者夠距離，點解佢一開始又要戴口罩？究竟呢個底褲口罩係太鬆定太緊？相信只有林鄭自己先知。