大肚婆大晒呀？係啊，係大晒㗎，兩條命比起一個人，你話係咪大一啲啲？未誕生的胎兒係咪比一個成年人渣有價值一啲啲？
警察大晒呀？話犯法就犯法？又係㗎。大肚婆個老公為保護懷胎九月個老婆，大聲提醒防暴警，最後以行為不檢被捕。說警察執法不公，似乎並非fair comment，忠誠勇毅不是服務精神，只是一種風格，嚴謹執法，不論肚子大細，一視同仁，勇於挑戰人倫底線，毅力可嘉。大肚婆淨係得個肚夠大，胎入面嗰個唔係人，只係一堆蛋白質。警方視之為回春補品，亦可謂順應國人文化。
細路爆喊大晒呀？梗係唔係，細路仔見到殭屍又喊，見到喪屍又喊，見到狼狗又喊，見到林鄭個樣都可能嚇到喊。防暴警帶走老公，老婆拖住兩個細路，細路罪名是細膽，老婆有罪是沒家教，被警察訓誡，要做個負責任嘅家長。咁咪係，一家四口行咩街呢。
「推開」孕婦與「拉開」大肚婆有什麼分別？分別大囉，「推開」係想你仆街，「拉開」個動機係「你咪埋嚟啊仆街」，無論推與拉，執法一用力，結果一樣係仆街。
再嚟，老人家大晒呀？大唔晒，分大中細，最大嗰啲係民建聯工聯會最大票倉，最細係學人做架樑嗰批。
老人家跪喺度大晒呀？咪玩啦，港警廉潔，怎會恨你老人家膝下有黃金？一腳就踢開啦，唔告吓你阻差辦公兼行賄就算徇私啦。
孟子有云：「民為貴，社稷次之，君為輕」，今日貞子有云：「警為貴，大肚婆次之，老人再次之，年輕人為輕。」
其實，警察識拉，大肚婆真係好好拉，老人家真係好好拉，長得有模有樣的後生女就最好拉。君不見每次拘捕，收穫主要是好眉好貌黑衣後生仔女，俗語有云：白狗出動，黑仔當災。
林鄭特首對孕婦倒地送院事件，認為不是那麼好，會對相關部門了解，那顯然是對大肚婆偏袒，因為順應今日香港形勢，孕婦有罪，胎兒也會受株連。
好嬲？嬲大晒呀。特首問我們：「如果沒有衝突，警察點解需要執法？」係囉，插花紀念吓啫，人多違反限聚令啫，咪好似排隊免費自願檢疫之嘛，選舉怕人多咪最多押後？警察唔重兵擺布袋陣，條街咁闊，點咁容易有衝突吖。
咁特首又大晒呀？梗係啦，佢老細都有兩個，一個係大帝，一個係佢口中會公義彰顯嘅上帝，仲唔大晒？