早前有香港「性地」之稱嘅尖沙嘴香檳大廈，被恒基地產申請強拍。再早啲又有新聞報道，話影帝梁朝偉買入嘅幾個土瓜灣地舖，被財團申請強拍。
作為物業投資者嘅我，現實想做個簡單嘅收租佬，越來越難。
從前有啲前輩同我講，買舖比買樓好，一舖可以養三代。銀碼可能大啲，但只要睇中地段，好多時都只會有買貴，無買錯。買舖又唔驚變凶宅，吉舖畀人，吉舖交還。租客要自己裝修，唔租又要還原。最緊要我手上有按金，你搞唔好我就扣。
但自從有咗網購，實體店嘅需求就大減，王維基將香港網購推上神枱。現在大家除了出街食飯外，街上人流大減，銅鑼灣都慘淡，黃金地舖神話慢慢被打破。人無千日好，花無百日紅，商業地舖旺開就旺，一靜就靜開有條路。當條街嘅店舖一間間咁執，基本上啲人就唔多點行。舊時好旺嘅柏麗大道，家陣就靜到連烏蠅都無，業主想吸血都難。
從前中小企比較多，市場比較平面化，你交唔到租就過主。疫情令中小企死晒，我租畀大集團，面對大財團的條件又無議價能力，搞到做散戶嘅物業投資者就難上加難。如果買錯舖，附近嘅小店開始結業，想金蟬脫殼都非常難。
最慘係原來小店唔係做唔掂，而係附近嘅物業已經被某發展商睇中，插咗釘喺度，開始唔再租畀人，搞到十室九空。到發展商收夠貨，之後就一野同你申請強拍，梁朝偉都無面畀。早前有個手工啤酒吧被人疫市加租五成，都唔知係咪想迫人走，準備重建。
所以現在買舖，唔可以單睇租金回報。或者喺全城都吉舖嘅情況下，租金嘅意義唔太大。反而留意吓，有冇啲大財團，睇中咗某啲舊樓，可以早佢一步插支釘。如果買得早，又揸得耐，基本上你嘅投資回報就唔再係租金回報，而係佢嘅「重置價值」。若果舊樓嘅地積比率又未用盡，同唔受高度限制影響，佢重建嘅價值就遠高於擺喺度收租。
不過要同發展商玩，係極高難度的賭博。因為發展商會用艇仔去收貨，好低調，要快人一步都唔易。再者，發展商通常收貨時，第一口價係會比較平，去到強制拍賣前嘅最後一口係最貴。如果揸得太耐，過咗強拍先賣畀發展商，就會變咗任人魚肉。
投資重建物業就好似煎魚咁，要煎到剛剛好先上碟，係最好食。唔可以太耐，一耐就會煎燶。所以家陣玩舖越來越難，想安份做個簡單收租佬都唔得，搵食真難。
藍友斑