捉過鬥獸棋嘅朋友，都會知道老鼠係大象嘅剋星，估唔到建制派噚日下午齊集立法會大堂，為全民檢測宣傳造勢影大合照期間，亦出現鼠王芬梁美芬硬撼民建聯象哥黃定光一幕，最終現實比棋局殘酷，鼠王芬喺象哥大力拉扯下，一度失平衡幾乎跌低！
話說噚日着裙嘅鼠王芬，原本同象哥一齊企喺前排，其後由於建制派議員人多，惟有分成兩排影相。其間民建聯元秋蔣麗芸即隔空施展獅吼功，向企喺前排嘅梁美芬高喊：「踎啊，美芬！」梁美芬不為所動，反嗌：「唔踎！」
俾美芬遮住嘅象哥相當不滿，加入叫鼠王芬踎低行列，但梁繼續企硬，並向象哥話：「你可以企前面㗎！我冇阻你喎，你咪企前面囉！」象哥此時更加扯火，怒吼：「喂，你係咪咁樣企啊？梁美芬！」鼠王芬聽到後似乎相當不耐煩，一度用手踭叫象哥企前，此時象哥終於嬲到爆煲，出手大力扯鼠王芬去較後位置，令鼠王芬即時嚇到嗌咗出嚟，身邊嘅建制派議員睇到都呆晒。
八方事後問過象哥點解咁嬲？佢話唔明點解梁美芬係都要企喺佢前面；鼠王芬事後就力斥象哥「真係離晒譜」，話覺得自己真係好無辜，話因為着咗裙唔方便先堅持點都唔踎低，「我真係着裙吖嘛，點踎啫？」
八方噚日現場所見，42名建制派議員中，32人出席合照環節，當中27人即場接受檢測，即係有成10個人冇蒲頭。咁接受咗檢測嘅議員有乜感受呢？元秋就話進行咽喉拭子測試時，醫護人員叫佢唱歌咁樣就可以，大讚棉花棒「真係好soft」；至於進行鼻咽拭子測試時，佢就話由於平時都有用水洗鼻，所以覺得「very good」。何君堯就話好似俾人喺個鼻灌水咁，但強調「不過好容易受嘅啫！前後夾埋都係30秒」。
李八方