娛樂圈向來有唔同小圈子，社會運動後就反而簡單咗，因為只有「藍組」同「黃組」，一直靠北水養嘅係邊一組，都唔使點多講。但公道講句人人都要搵食，如果因為自己而影響到整個團隊，亦係好難面對嘅事。之但係有一啲藝人真係好乞人憎，學歷高加滿口英文又如何？人品、人格都差，呢啲人就應該抵制。
好似有個入咗行十年左右嘅「龍仔」，雖然當年喺香港出道，拍港產片拍到有人識，亦喺呢度搵過唔少錢，但自從早幾年佢俾一位前輩睇中，幫佢喺內地搵咗好多錢，就一去無回頭喇，已經同呢位前輩冇任何接觸。
唔少公關同Jessie呻，龍仔飲咗咁耐北水，話佢完全冇本心，佢哋喺龍仔啱啱出道、冇人搵佢做嘢嗰陣，畀機會佢出活動吸下人氣。但龍仔賺慣咗人仔之後，香港想搵佢出下活動，佢就幾乎全數推晒，又或者會獅子開大口畀個天王價你，少少價都冇情講，所以香港嘅公司都唔會再搵佢做嘢，加上龍仔喺香港嘅受歡迎程度本來就唔係高。
不過，唔好以為龍仔成日留喺內地，已經搭好天地線唔休做，聽當地啲幕後人員話，其實嗰邊好多人都唔鍾意佢，覺得龍仔好假又唔識做戲，當年只係畀面個前輩先至搵佢。據知龍仔都知道自己人緣麻麻，所以諗住近水樓台，留喺內地唔走就有工開。
撰文：Jessie
本欄逢周三刊出
我姐匙縱橫歌影視幕後，多年冷眼旁觀，娛樂圈大小事都走唔過我雙眼，歡迎大家剝花生。