第一次在餃子專頁留言找容迪，她回覆：「訪問要出鏡嗎？我是一個肥妹呢！」繼而透過電話傾談，已發現這位「肥妹」落落大方，談起餃子，隔着話筒也感受到她的眉飛色舞。寫餃子食評以外，她還會包餃子，朱古力牛肉餃、芝士鹹蛋黃墨魚餃……奇怪口味多不勝數，對餃子瘋狂至極。「未膩，餃子世界有太多變化，睇唔到餃子有悶嘅一日。」容迪說。
廣告從業員容迪，30歲，是facebook專頁「餃控」創辦人，兩年前開始寫餃子食評，寫了超過300篇，吃過600款餃子。「網上好多foodie，但覺得專頁好雜亂，未必睇到自己想睇嘅嘢。既然自己好鍾意食餃子，不同配料又可以產生不同化學作用，我諗應該會有一個族群喜歡餃子呢個範疇，我又有機會食到不同款式嘅餃子。」
她偏愛奇怪口味，但中伏的亦不少。「史上最難食應該係喺HKTVmall買嘅韓式拌飯餃，薄薄餃皮包咗好多飯，澱粉質加澱粉質，冇肉冇菜，感覺唔係好開心，亦唔係想像中嘅甜辣。」她認為，既然本身喜歡甚麼都試，何不自創餃子味道。「近排整緊朱古力牛肉餃，靈感來自黃店Mini Friday，有個朱古力牛柳，牛柳上加朱古力淋上燃點中嘅酒，朱古力融化後，又甜又鹹，發現朱古力同牛肉好夾。」
她的招牌餃子為豬腸辣醬餃子，由韓國辣炒豬腸演變而成；還有最新研發的鹹蛋芝士芫荽墨魚餃。我們將三款餃子拿給《蘋果》飯堂負責水吧的奶茶哥哥試食，他對鹹蛋芝士芫荽墨魚餃評價最高，「創意度高」，5分滿分給了4分；豬腸辣醬餃子則評以「近似八方雲集泡菜餃」，給3分；朱古力牛肉餃，「第一啖咬落去似爆漿丸，但食起上嚟較乾身」，所以只得2分。
這天容迪家姐亦有到場陪伴容迪訪問，還一起試她新包的餃子。容迪說：「餃控呢個專頁可以畀更多人知道，都係全靠家姐建議我開咗個facebook group『餃控與她的餃伴們』，等我有機會認識多啲同道中人，佢平時會陪我食餃，咁就有多一個人嘅意見納入食評。」加入她的group要先答三條問題，（一）愛餃與公義嗎？（二）有勇氣說出對餃子和公義的見解嗎？（三）會支持良心經濟圈嗎？「我發覺唔少人第二題答『沒有』，我開呢個group，原意係借呢個空間交流，希望大家講出啱嘅嘢，而家言論自由收窄，可以表達公義嘅渠道更少。」
她近年選擇餐廳寫餃子食評時還會看顏色，「我屋企人好鍾意食一款帶子餃，屬十星級（最好味），真係好好味，但有網友話我知佢係紅到黑嗰隻，以後就冇再食。呢年幾以來，意識到每一個人作出消費選擇，會好影響經濟，希望幫助本土小生意。」
容迪亦會寫燒賣、非中式餃子食評，推介的大多是黃店。「我近排食過中環嘅烏克蘭餐廳，外皮同餡料似足中國餃子，但仲有刁草等香料和忌廉，食感、味道完全唔一樣，我十分推介。」說起推介她滔滔不絕，「上環有間永樂餃子店，淮山花膠湯好甜，餃子皮唔算好薄，但好大隻、好多餡料，最推介是海鮮餃，有蝦、有魷魚，口感勁豐富。」
平日到超市，第一時間會到餃子區，發掘新餃子味道。「大阪王將羽根餃子極受網友歡迎，好多餃子通常會製冰花底，即係類似成餅咁上碟。但一般餃子要整冰花底較難處理，呢個餃子本身已配好油水比例，只要全部餃子放落鑊煎，就已經有好靚嘅冰花皮。」但同一款餃子亦要留意多一個元素，「餃子有不同代理商，好似Donki買到嘅代理商係四洲，亦有網友發現AEON同百佳係佢哋自己代理。要買好食餃子，都要睇清楚代理商。」
寫餃子食評，取得滿足感，但同時會吃得太多、花錢太多，兼且受網上攻擊。
「由細到大都習慣咗人哋對肥妹有特別眼光，好易分辨到你行過嚟係善意定惡意，經常會有人見到你，由上至下先打量你，然後走咗去……我曾經好執着，但而家嘗試唔好咁執着。加上開咗餃子專頁之後，知道有啲人唔一定會認同你嘅觀點，只要我做自己，開心就得。」容迪說。容家姐聽罷說：「容迪由細肥到大，佢鍾意食嘢好多人都知，肥妹當然鍾意食，但都係體質問題。肥，減低佢自信，但佢寫餃子食評之後，覺得佢表現自己多咗，佢知道點去處理攻擊者。有時佢約餃伴出來見面，又可以交朋友，呢啲都畀到佢好多溫暖。」容迪透露她還有個心願：開一間吃到高膽固醇的餐廳。「餐牌有鹹蛋黃、芝士、內臟、鵝肝等食物，應該會好開心，我覺得對心靈上健康都會有用，我唔會每日叫人嚟食，一星期一次，其他時間你食沙律啦！」
滿分為10★
餃控facebook : dumplingholic
記者：何嘉茵
攝影：黃智琳、伍慶泉