今季歐聯法甲嘅里昂超神奇，連續淘汰祖雲達斯同曼城殺入四強，不過最終輸畀拜仁慕尼黑飲恨出局。但係喺女足嘅世界入面，里昂就係一流嘅班霸，禮拜日嘅女子歐聯決賽入面就以3:1擊敗禾夫斯堡，完成前無古人嘅五連霸。決賽喺西班牙舉行，而且由里昂先開紀錄，上半場25分鐘妮森瑪補射起腳先開紀錄。完半場前，里昂嘅日本國腳後衞熊谷紗希禁區外起腳一射中鵠，助里昂拉開比數，而熊谷紗希亦成為史上首位喺歐聯決賽入球嘅日本球員。換邊後狼堡雖有中場普比近門頂入追近比數，但臨完場前里昂嘅根娜度迪門前撞射埋齋，最終以3:1擊敗禾夫斯堡，完成女子歐聯五連霸，由2010年開始第7次捧走冠軍。