廣播處長一職，自朱培慶於2007年9月離任後，改為公開招聘，不再由香港電台職員升任，於是黃華麒在2008年8月受聘，做唔夠三年，2011年2月就離開；繼任人難尋，政府索性空降一位AO鄧忍光任廣播處長，做足四年，由2011年9月做到2015年8月調職；然後又公開招聘，呢次搵到電視台新聞部資深人物梁家榮做處長，無縫交接。梁於2015年8月上台，不久前公開宣示，在2021年8月完成第二個合約之後，就會離開。於是現時獵頭族又到處搵適合人物做廣播處長，月薪25萬，有約滿酬金，在傳媒界來講，算係好高薪㗎啦！實不相瞞，黃華麒上任之前，獵頭族到處搵人，打電話嚟問過左丁山有無興趣來應徵，左丁山耍手擰頭，一來自己冇資格，二來知道個位係上下交煎位，好難食。到了今天，又有陳建強呢位先生伸手問三問四，藍絲幾乎日日投訴，大家都戥梁家榮可憐！夠膽應徵代替榮總嘅能人高手，要有極大勇氣先至得。有一點係好咗嘅，就係陳建強做顧問委員會主席太耐，卒之要鬆人，由政府委任林大輝替代，林大輝份人有傾有講，唔係CY同路人，應該冇強烈預設政治立場，未來處長唔會有人在旁邊囉囉嗦嗦。
黃華麒出身港台，梁家榮出身電視，兩位外聘處長都熟悉電台電視事務，日前新亞師弟馮強就透露有獵頭族搵佢，睇落佢冇興趣角逐㗎嘞！因為如果想做，在此階段梗係秘而不宣㗎啦！馮強讀新聞系成績優異，一開始就係亞洲華爾街日報記者，報導中國經濟，英文好掂，去完劍橋讀碩士返嚟，又做過南華早報副總編輯、讀者文摘中文版總編輯，正所謂兩文三語皆精，唯一可惜就係冇乜電台電視工作經驗，吃虧之至。
原來馮強之fb訊息已在傳媒界廣傳。一位朋友來電：「據知，已有超過100人收到電話。」唔係呀！香港竟有咁多人有資格做廣播處長？唔怪得一位反港台常客鄧德成都申請做處長，獵頭族可能係撒魚網，周圍搵料啫！以現時林鄭之強勢，警務處之「惡勢」，下任廣播處長不出自藍絲陣營先至奇。另一位老友來短訊：「我買馮煒光，最啱CY心水！」咦！呢位老馮一定好過馮強，啱聽！建制派好憎中大，林鄭又同劍橋唔妥，新亞人馮強難搞啲喎。港大馮煒光係前市長愛將，現市長校友兼藍到出汁，雖無電子傳媒經驗，都勝過馮強㗎！