【本報訊】為捍衞本土文化，北區區議會主席羅庭德的兄長羅庭輝，眾籌推出實習計劃，招募年輕人當「實習農夫」。經過兩個月特訓，曬得一身健康膚色的「實習農夫」，正籌備推出本地「菜籃」計劃，讓港人月付固定價錢購買本地蔬果，實踐「香港人食返香港菜」。
羅指今年初原擬眾籌33萬元推出第一期「本土青年重投香港實業先導計劃」，招募16名年輕人到七間本地工場、農莊等做實習，最終籌得近六萬元，羅決定如常推出計劃，籌得款項撥予僱主支薪，參加者每月獲5,000元。實習期由6月16日至上月15日。
四位年輕人今年4月參加計劃，率先成為實習農夫，正式展開「崩潰」之旅。就讀大學言語治療學系三年級的Heidi直言實習初期極其艱辛，「一開頭琴姐（農場主人）要我哋挖個50cm嘅窿，真係挖到好絕望」，形容全部人「挖到散晒」。
化身為除草師的入中大文化研究學生Carol表示，自己由「一開始嚟到唔知咩草抆得，有啲抆完先發現唔係野草」，到「𠵱家已經認得啲樣，一嚟就用刀剪走佢」，過程極不容易。經歷一星期特訓，四人均脫胎換骨，「嗰陣拎鋤頭鋤咗一兩個鐘，原來都唔覺得好攰」。
四人完成實習，但更大的挑戰在眼前，就是如何協助出售農莊產品，他們早前小試牛刀，將其貌不揚，銷情欠佳的有機火龍果製成「火龍果乾」，放上網出售，「我哋賣緊100克85蚊，嚟緊會調整個價」，吸引了街客特意惠顧。
「菜籃」計劃更是重點。最精打細算的Jeffrey表示，「我哋希望香港人每月畀一嚿錢，然後我哋每個禮拜提供呢度種嘅蔬果」。另一成員Zoe指計劃目的是「香港人食返香港菜」，「𠵱家我哋食嘅菜，大部份由內地供港，既然我哋農地咁多，我哋都供應到一部份，咁點解唔係香港人自己食返？」她指，有機蔬果價錢雖較貴，但產品健康，計劃更可提升港人自給自足的意識，「如果要自給自足，最緊要自己支持返自己」。