唔少香港人聽到「三萬Thanks！」呢句反送中運動潮語，相信都會會心微笑，一班喺深圳駐守嘅大陸武警，噚日就唔知攞景定贈興，喺中英街邊境位置，向近來有唔少警員確診武漢肺炎嘅香港警隊送上三萬幾個口罩，向來備受藍絲同大陸小粉紅吹捧嘅「光頭警長」劉澤基，都有現身沙頭角邊境，邊接口罩邊講「謝謝」，仲邊高呼：「我們是一家人！」
《深圳特區報》噚日報道，一批深圳武警今日將34,200個N95口罩送咗畀香港沙頭角邊界警區，其間喺內地爆紅嘅「光頭警長」劉澤基更現身接罩，並用唔多流暢嘅普通話受訪，自爆早喺九年前駐守中英街時，已經認識噚日送口罩嘅大陸武警隊長趙文超，兩人更曾喺新年其間一齊巡邏。
趙文超受訪時就話，今次送口罩係因為香港疫情「比較嚴重」，佢哋見到近日接連有香港警察感染肺炎，覺得「很心痛」喎。