全民撩喉，政府包裝成「普及社區檢測」，擲258萬在11份報章落廣告，蘋果無份。已經不是頭一趟，送中條例至撐国安法，政府慷庫房之慨從來獨欠蘋果。不過，就算政府搵蘋果買頭版，沙膽虹點會俾佢落A1呢。頭版，留返俾親愛的小小黃族。
關於撩喉，我冇say。天意叫鄭市長揀定今天陰曆鬼門關大開之日，叫市民擘大金口。「雙開」並非巧合，風水專家講過，有得避，應該避。但預撩的booking今明兩天一早爆額，市民咁猛，像極了殉情。我心腸正常，不打算唱反調，但預感唔少人托手踭唔俾面特區高官，為首者乃721元朗白衫。明明藤條木棍「教仔」，人多勢眾打到黑衣人皮開肉綻，一年後點會改成「旗鼓相當」？擺明把白衫的義勇降呢！721市民目睹，白衫橫掃主場，馳援的軍裝，轉身走人，與自稱被打爆痱滋兼走投無路的水刮差佬一樣噃，保家衛國，邊個好打得呢，還用問嗎？白衫絕不接受condom宿命，撩喉呢鋪，實行玩杯葛，吊高來賣。
為鬼為神，鄭市長拉埋湯漢做深喉感召，像極了隱性愛情。