原本近排已冇乜人理佢嘅國家領導人級鍵盤戰士、政協副主席兼前特首梁振英，早排因為拎前任特首辦做佢803 基金有限公司嘅地址，仲有喺老撾搞學校爛尾，先叫有傳媒報道下佢，唔知689係咪想爭取曝光，噚日係fb無端端拎才子陶傑專欄出嚟抽水，寸陶傑會唔會放棄永久居民身份，點知才子一出手就秒殺，反問689同所有政府高層及佢哋所有家人，會唔會一齊放棄外國居留權呢？
689喺佢fb貼咗陶傑一篇專欄，篇專欄其實冇乜特別，都係講下近日好多港人講嘅拎BNO移民英國，才子喺篇文入面都係一貫抽少少水，但689好似執到寶咁，喺fb貼篇專欄，仲藉機挑才子機，話才子肯放棄永久居民身份，佢送機票，「#身體最誠實。#如果陶傑選擇放棄香港永久居民身份證，去英國生活，請早點告訴大家，我送單程機票。」
八方見689敢挑才子機，咪短訊問才子有乜回應？才子回覆八方，第一句已打689面：「在香港出生，根據基本法先天擁有香港永久居留權。」呢個又啱喎！才子係香港出世，依法係先天有永久居留權！
之後才子嚟料，佢先話後天歸化英國籍或擁有居留權嘅人，「按英國法例，一生可以放棄一次，日後重新申請領回」，之後佢就話：「如果兩位政協副主席（即包埋董建華）、行會及司局級全體官員及其家屬全體願意放棄加拿大澳洲居留權及美國綠卡，並放棄英國籍或居英權兩次，響應民意及遵守中國官員國籍規定，我將會十分樂意接受梁振英奉送的這張單程機票，經濟艙都得，同佢慳錢。」留意才子講明叫佢哋「放棄英國籍或居英權兩次」，即係唔畀有英籍或居英權嘅人日後恢復英籍。才子最後仲抽多佢哋一句，「請上述有關人士協助我達成這個願望。謝謝。」
李八方