阿仙奴一個月內連奪英足盃同社區盾，喺領隊阿迪達嘅帶領下重返正軌，就連上季盛傳會離隊嘅隊長奧巴美揚（圖），喺兵工廠連捧兩盃後似乎已經改變主意，英國《鏡報》話奧巴美揚已經同槍手達成咗周薪25萬鎊嘅續約協議，呢單令球隊士氣大振嘅消息，有望喺9月12日英超開鑼戰，作客富咸前夕正式向外界宣佈。據報領隊阿迪達嘅留人大計唔止係咁，盛傳或會轉投狼隊嘅守衞美蘭尼爾斯，喺社區盾成為最佳球員後，據報呢名23歲青訓產品若願意留隊，將可以獲得一份新合約改善待遇。阿迪達亦希望，表現出色嘅門將達米安馬天尼斯繼續留隊，同德國門將賓特尼奴形成良性競爭，要賣就賣洛賀丁同古安杜斯喎！