狼隊右閘馬特杜靴迪啱啱喺禮拜日轉投熱刺，係領隊摩連奴今季第三筆收購。熱刺禮拜日就發佈咗段短片，幫杜靴迪多年前曾經公開表示自己係阿仙奴球迷嘅言論洗底，段片夠晒幽默之餘仲畀網民大讚「好橋」，熱刺嘅一班公關真係抵讚。
28歲嘅杜靴迪同熱刺簽約4年，將會喺新東家着2號波衫，據報轉會費大約1,500萬鎊（約1.5億港元），繼丹麥中場賀積查治同英格蘭門將赫特後，成為今季加盟熱刺嘅第三位新兵。
杜靴迪10/11球季喺狼隊出道，過去10年除咗2次外借過去蘇超喜伯年同英甲貝利外，其餘時間一直踢狼隊，聽講摩佬今次簽入呢位愛爾蘭國腳，係希望佢取代唔太穩陣嘅奧里亞打正選。杜靴迪接受熱刺官網訪問時就話，對自己喺球員生涯高峯加盟熱刺感興奮，仲話上個禮拜同踢過熱刺嘅愛爾蘭傳奇前鋒羅比堅尼見面，對方仲祝福佢今次轉會。
摩連奴就話杜靴迪過去10年由英甲、英冠、英超以至歐霸都踢過，經驗好豐富，仲話好唔鍾意同杜靴迪呢位球員打對台，所以好高興可成功將佢變成熱刺一分子咁話。
雖然杜靴迪口口聲聲話轉投熱刺好開心，但佢其實係阿仙奴球迷，家陣佢加盟兵工廠死敵就梗係要洗底啦。熱刺成功收購杜靴迪當日就喺twitter出咗段片做嘢，免得刺迷以為收購咗個「身在曹營心在漢」嘅球員返嚟。
短片一開始就影住着住熱刺波衫嘅杜靴迪開電腦登入twitter，然後喺鏡頭面前，刪咗兩條喺2012同13年表示自己「永遠都愛阿仙奴」同「我喺阿仙奴嘅忠實擁躉」嘅貼文，再擺出一個尷尬樣然後拍拍胸前嘅熱刺會徽。雖然唔知杜靴迪真係「變心」，定後為咗搵食而配合新東家，不過效果認真唔錯，唔少網民都話呢段係其中一條最正嘅官宣短片。其實以前支持過同市宿敵只係閒事啫，熱刺當家射手哈利卡尼八歲嗰陣直頭入過阿仙奴足球學校、仲着住兵工廠波衫影相，今時今日咪又係熱刺大佬！