政府預測今年會出現巨額財政赤字，理論上，我講緊嘅係理論上，要繼續明日大嶼應該唔係咁容易做到，不過呢度要處理幾個思考盲點。
第一，咁多屆財爺從來對自己庫房嘅財政預測都係有極大落差，陳茂波係咁、曾俊華都係咁。基於量入為出嘅守財奴原則，大家都慣性報細數，講得慘啲。
第二，呢十幾年香港政府嘅非經常性收入係非常之多，所以從來預測唔準都有原因。我哋仲有賣地呢一招，透過賣地或者相關地產嘅印花稅維持收入，唔係話做唔到嘅一回事。
第三，政府是可以發債的，當然我哋比較熟習嘅政府債券係通脹掛鈎債券。雖然信貸評級將香港政府評級比較低一啲，但係相信如果政府肯發債，依然都係有人仆住來買。
香港政府嘅印鈔權係同外國勢力掛鈎，呢種技術叫聯繫滙率。一般政府發債冇錢還，可以透過印銀紙找數，香港政府做唔到呢招，所以當政府冇錢，理論上係比其他經濟體更加脆弱。都係嗰句啦，我哋支持國安法，一定唔可以將港元勾結美元，要掛鈎就要掛人民幣，咁樣先係愛國愛港嘅炎黃子孫。國家最近重新推出數字貨幣呢種劃時代金融發明，一聽到就心都定晒，就好似全民檢測一樣咁有說服力。相信政府，冇事，除非有事。
渾水