西甲賽會喺禮拜日表態撐巴塞隆拿，指美斯合約中嘅免費離隊條款已經過期，要走人麻煩畀足錢。33歲嘅美斯免費離隊未成事，同球會關係似乎更加惡劣，繼禮拜日冇現身參加武漢肺炎病毒檢測之後，禮拜一亦冇出現參加球隊集訓，玩到罷工睇嚟球王真係決心非走不可。據西媒報道，美斯嘅老竇兼代表佐治美斯，將會喺禮拜三同巴塞代表，包括會長巴杜美會面，傾吓點解決問題，或者研究吓可唔可以收順啲放人，美斯同巴塞合約嘅違約金，高達七億歐元（約65億港元）。美斯要走好難，但佢老友蘇亞雷斯就好容易甚至可以袋多筆錢先走。阿蘇俾新教練朗奴高文通知唔喺巴塞下季計劃內，如果球會要同佢提前一年解約，有報道話巴塞要賠一筆1,400萬歐元嘅解約金畀呢位周薪嘅烏拉圭前鋒，都幾和味，另外，中場拿傑迪錫都好快會返西維爾，巴塞都真係有排執。