曼聯今夏頭頭碰着黑，先有隊長哈利馬古尼喺希臘度假，涉嫌襲擊等罪名俾人拉咗，官司都未搞掂又輪到中場大將保羅普巴確診武漢肺炎，加上紅魔鬼今個轉會窗一直未買到人，競爭對手車路士就一下子簽咗成4、5件，相信一眾魔迷都好擔心㗎喇！不過禮拜日似乎有好消息流出，話說各大外媒都爭相報道，曼聯喺阿積士中場雲迪碧克嘅爭奪戰中跑出，呢位荷蘭新晉國腳有機會成為紅魔鬼今夏首位新兵。
新球季將會重返歐聯嘅曼聯，今個夏天轉會窗開始嗰陣都幾令人期待，一開始話會簽查頓辛祖，跟住話會簽基亞利殊，點知去到成8月31號傳統轉會窗就嚟關閉嘅日子，一個人都未買到，只係從錫菲聯收番23歲門將甸恩軒達臣返嚟，同迪基亞爭吓正選，對整體實力未見有大幫助喎！
好彩，今個夏天英超嘅轉會窗因為武肺疫情關係，會延遲到10月5號先會閂，仲有個幾月嘅時間畀曼聯慢慢增兵，禮拜日外媒就爆出，曼聯好大機會搶贏巴塞隆拿，買到阿積士中場雲迪碧克。事關呢位荷蘭國腳喺上禮拜六，並冇喺代表阿積士對法蘭克福嘅熱身賽上陣，賽後阿積士教練坦哈格被問到雲迪碧克係咪就快走人時，仲承認：「冇錯，係有啲事態發展緊，所以佢唔喺球隊陣中。」
雖然一直有傳雲迪碧克會隨前荷蘭國家隊教練朗奴高文，去巴塞隆拿組建荷蘭幫，不過ESPN隨即話收到消息，曼聯喺雲迪碧克爭奪戰中最有機，巴塞反而唔係雲迪碧克嘅選擇喎！不過部份英媒就比較冷靜，好似《電訊報》就話曼聯係對呢位中場有興趣，但仲未正式報價。
之不過雲迪碧克無啦啦唔踢熱身賽，轉會似乎已成定局，問題係佢會去邊間球會㗎啫！如果真係加盟曼聯嘅話，配合波基斯費南迪斯同保羅普巴組成中場鐵三角，都咪話唔得人驚，不過呢三位中場似乎都偏向進攻多過防守，到時會點樣用雲迪碧克，甚至乎曼聯嘅4-3-3陣式會唔會改變，就要睇領隊蘇斯克查嘅功力同選擇喇！
至於隊長哈利馬古尼嘅官司問題就仲未解決，由於曼聯喺禮拜三就會正式開操，英國《太陽報》報道就話紅魔已經批准馬古尼遲幾日歸隊，希望比多啲時間佢搞得掂單官司先返嚟英國，報道估計馬古尼最快會喺嚟緊嘅周末同曼聯隊友重聚，唔知到時會唔會見到「新隊友」雲迪碧克呢？