肥仔K女兒N第一日做小學生，在家中客廳睇住電視上課，三個幾小時後因Zoom老師家中樓上有裝修，鑽孔聲震耳欲聾，因此腰斬，肥仔K話為今年全港小一學生擔心。左丁山同佢講：「本港住宅面積細，每一層住宅大廈又有好多伙人，在家授課，在家上堂，睇怕幾難有完全寧靜環境，以後幾個月靠Zoom，似係常態，只好盡量適應！」之後左丁山見到呢位小一新生N，問小女孩：「上堂上成點？」N答：「boring」。問：「教咗乜？」答：「中英數」。問：「教成點？」答：「messy」。問：「有乜唔識呀？」答：「Maths sucks！」真係畀佢氣壞！N女睇慣英文頻道多，肥仔K准佢三姊弟每日睇一小時電視頻道443、444、445，全部英文對白，於是小N每日英語單字衝口而出，問番佢中文係乜意思，佢話諗唔到，本來英文識得多，冇乜所謂，但佢每每抗拒學習中文字，又幾麻煩。
年輕朋友G個仔今日也開學，為此朋友G在家忙足半個月籌備，佢兩公婆都要返工，爸爸媽媽已80幾，不甚懂英文，對調校電腦用Zoom上課，一啲都唔識，本來朋友G細佬係老師，可以幫忙吓嘅，但細佬係名校教師，一定要回校Zoom，不得在家授課，咁點好呢？朋友G唯有與老公輪流告一個星期假，在家睇住，但不能長期如此㗎！故此朋友G話：「可能我遲早都有神經病，返工已經緊張，又為兒子家中上課緊張，好驚電腦斷線，Zoom失靈，爸媽在家搞唔掂，又驚個仔吸收唔到，回家要逐科書同佢溫習，哎吔，楊潤雄有乜辦法救吓我地家長呀？」唔好咁大想頭，楊局長兒子在澳洲，冇問題，點會諗得到香港有好多人在家學習困難！朋友G嘅問題，高官家中唔會發生嘅。例如朋友G話同學係教師，有兩個仔女，要在家中安裝三部電腦授課上課，顧得教時又唔顧得仔女上課唔集中，坐唔定，如回校Zoom，屋企又冇人睇住兩個仔女，真係煩到要鬧老公，叫老公告假回家幫手，不過佢都知，大家要搵食嘅噃！中產階級已如此辛苦，基層公屋以至劏房住戶嘅兒女又如何在家中上課？朋友G話不敢想像，如此教學上課方法，肯定會擴大貧富差距，知識差距，但目前教育局掛住刪改通識教育課程內容（如踢走六四集會題目），主力搞愛國教育，其他唔理會㗎嘞！