早排一批流亡海外嘅年輕人俾廣東海警喺南海水域截獲，之後下落未明，港府固然冇提供佢哋嘅消息，大陸事發多日都未有正式通知佢哋屋企人，究竟被捕人有幾多人權保障？港人甚至世界都睇到。正當家人為子女安全心慌意亂之際，有左媒同藍絲四圍傳假新聞，話佢哋已經提堂，發現係流料之後就偷偷地刪咗，藍絲仲要扮睇唔到繼續傳。
好似大公文匯傳媒集團旗下嘅免費報《香港仔》，噚日喺facebook發佈咗條影片，話12個港人喺內地提堂，片中有人雙手鎖上手銬，仲着晒全套防護衣、眼罩同口罩，帖文仲話有關人士隔離未夠14日。轉個頭帖文已經被刪，但唔見《香港仔》有任何解釋。
八方本住求真精神，發現片段其實同年輕人被扣事件冇關，而係貴州興義一班追債團伙受審，最諷刺係《大公報》噚日喺A4版都有寫片段唔關事，但點估到唔只香港人唔睇《大公》，連佢哋自己人都唔睇，《香港仔》fb專頁仲以為執到寶報道。其他藍絲都撞晒車，喺微博有成28萬粉絲嘅藍絲KOL「香港正義姐藍雪寶」更無視粉絲提醒，堅持唔刪除短片，甚至反過來質疑大陸法院可能係「特事特辦」快速提堂，又示範多次人一藍腦就殘，真係唔係扮㗎。
李八方