日防夜防，原來家賊真係最難防。話說曼城同奇雲迪布尼本來未來幾個禮拜就會簽新約，雖然29歲嘅迪布尼周薪已經成30萬鎊，而且𠵱家份約仲有三年先到期，但呢位比利時中場上季平咗亨利紀錄交出20次助攻，表現十分標青，而且《鏡報》仲報道，迪布尼下季好大機會接替離隊嘅大衛施華成為隊長，會方希望獎勵迪布尼，所以開份周薪350,000鎊嘅新合約畀佢，希望佢喺職業生涯高峯都可以留喺藍月。不過好衰唔衰，過去14年都做迪布尼嘅經理人高斯達懷疑穿櫃桶底被捕，目前被拘留同安排喺禮拜三提堂，所以曼城暫擱置續約一事。
事源迪布尼發現高斯達有唔尋常嘅現金流動，但冇記賬，部份仲流咗去避稅天堂列支敦士登，懷疑佢有欺詐嫌疑，所以就同老竇一齊要求比利時警方調查高斯達嘅財務狀況，有指迪布尼2015年以5,500萬鎊由禾夫斯堡轉會曼城嘅交易正被仔細審查。過去14年，迪布尼都係由高斯達做代表，仲視佢為家人，估唔到迪布尼咁信佢，佢竟然當人水魚，真係唔抵可憐。