話說有「鎖車城」稱號嘅沙田第一城範圍內，噚日見到一架印住李慧琼同葛珮帆大頭相、寫住「救香港 義無反顧」嘅民建聯貨車被鎖車，連民記車都冇面畀照鎖？
公民黨第一城區議員黃文萱接受八方查詢話，早前已經留意到民建聯架貨車不時喺第一城出現，由於第一城馬路好窄，所以有街坊噚日一見到架貨車違泊，即時向物業管理公司保安組投訴，職員義無反顧地鎖車，司機最終喺一粒鐘之後先駕車離開。根據資料，第一城鎖車嘅解鎖費用盛惠320蚊。
黃文萱話感謝保安組嘅盡責表現，希望民記日後唔好再違泊阻塞通道，話要將警察名言「犯法就係犯法，一定要負責」送返畀民記喎！