反修例運動去年中展開以來，不少圈中人如蕭若元、林夕及鄭敬基等相繼移民，影帝黃秋生前日在twitter說：「今天好日子，離開住了二十年的地方，展開新生活。」引起網民熱論，問他「移民去邊？」秋生昨日回覆《蘋果》時指目前只是「暫時搬家」，不過面對香港困局，還想再衝刺的秋生說︰「香港唔使諗，咁混亂。」更直言：「邊度有生機就去邊度。」今天是8.31一周年，他感觸地說︰「無言以對」。
現年59歲的黃秋生前日在twitter留言：「今天好日子，離開住了二十年的地方，展開新生活。」加上鄭敬基fb祝他新生活愉快，秋生回應：「多謝佢。」令網民即時充滿無限聯想，以為月前到台灣拍台劇《四樓的天堂》的他，決定移民台灣，紛紛留言「祝他一切順利」、「台灣事業成功」等。
秋生今年3月底時曾在fb貼文，表示有意「開倉」，其實當時他正計劃搬屋，適逢他早前接受李婉華「住加女人」訪問，曾透露台灣拍劇後會返香港搬屋，亦提過退休後會到加拿大，難怪網民會錯意，《蘋果》前晚聯絡秋生，他回覆：「暫時搬家。」
昨日記者再致電秋生，他再詳談移民想法︰「我講加拿大係因為兩個仔喺嗰邊，但退休我未諗，我仲有大筆債要還，仲要on and off工作。」他強調未有退休計劃，沒工作會悶死︰「60歲要退休嘅話，我出年都到，退休係冇人要你、冇人等你，係打太極、搵仔拎錢去旅行，我頂唔順咁嘅生活，三年就瓜老襯！」他覺得退休是「做又得，唔做又得，咁人就會萎縮。我仲想創造，寫書、做網台、搞舞台、開學校、搞製作。」計劃多多。
熱愛人生以及工作的秋生更直言：「邊度有嘢做咪去邊度，台灣如果有嘢做，我咪去留低兩個月、三個月。」他清楚看到香港目前情況，「香港唔使諗，咁混亂，經濟差，冇樂觀前景。」秋生5月留在台灣拍劇時，在當地短期生活過後，他分析：「台灣嗰邊空間、環境各方面都有，舞台、文化空間亦大。」雖然港台商業環境仍是有比較，秋生認為只要解決一些限制，台灣都很有發展空間。秋生的心聲是：「我都係普通巿民，唔止我哋呢行冇工開，各行各業都受影響，全球經濟咁差，邊度有生機就去邊度。」
秋生離港幾個月，巿民對政府怨氣更深，問他由台返港的感覺如何？秋生衝口而出：「感覺好陌生，我返嚟隔離咗十幾日，忙執嘢，放返出嚟又係執嘢，都有睇吓新聞。」顛倒是非黑白的新聞令他越看越火滾︰「原告變被告（指林卓廷和許智峯等被捕案），仲有乜好講，以後唔好報警，否則會拉你，成件事好明顯，點解釋？警方出嚟講嘢，有人頭擰擰、眼眨眨，佢表現正係演不知所措角色嘅範本。」秋生回憶童年時外婆跟他講那些叫「長毛人」的流浪漢：「佢哋會鬧人，千祈唔好同佢講嘢。」以「長毛人」揶揄高官。
今天是8.31太子站事件一周年，對這個日子，秋生說：「嘆氣……冇乜感覺，無言以對，仲有乜嘢好講。」更表示失望心情，也是近日自己未有更新fb的原因。
