自美斯要求離開巴塞隆拿後，就一直有傳英超班霸曼城對呢位阿根廷球王充滿興趣，有意喺夏季轉會窗將佢收歸旗下。禮拜四西班牙傳媒仲爆料，話藍月已出手向巴塞報價，希望用1億歐元（約9.1億港元），再加埋前鋒加比爾捷西斯、中場貝拿度施華（B施華）同中堅艾歷加西亞三個人做籌碼，真係不惜一切都要將美斯帶去曼城，值唔值呢？
其實為咗捧起歐聯冠軍，曼城近幾年喺領隊哥迪奧拿帶領下，每年都使唔少錢增兵，不過哥帥一直都突破唔到八強關口。今次知道美斯想離開巴塞，曼城當然唔會放過機會。西班牙嘅《每日體育報》就話，曼城已送上一億歐元報價，另加「耶穌仔」、B施華同小將艾歷加西亞三位球員，希望可以打動巴塞放人。
睇番曼城想放走嘅嗰三位球員，佢哋3個加埋身價絕對超過1億歐元，而且又後生又有實力。不過我求大俠就覺得，耶穌仔上季都搶唔贏阿古路個正選位，加上艾歷加西亞一早講過自己唔會同藍月續約，所以曼城放走佢哋都冇大影響，而B施華就正值當打，更加可以吸引巴塞放人。最重要嘅係藍月可以換到哥帥昔日愛將美斯，呢位球王嘅重要性一定大過晒呢三位球員，點計曼城都有着數！
美斯咁想走，主要原因係佢同巴塞會長巴杜美一早勢成水火。西媒指，成為眾矢之的嘅巴杜美，願意以辭職作為換取美斯留隊嘅條件，但就堅持美斯合約上免費離隊嘅條款已經無效。
至於同樣喺上季結束後傳過離隊嘅葡萄牙球王基斯坦奴朗拿度，就喺ig向祖雲達斯示忠：「我已準備好用祖記球員身份出戰第三季意甲，我野心從來冇變，希望入波、贏波、奉獻同專業。喺祖記隊友同球會協助下，我哋將會再度稱霸意大利、歐洲同世界！」