立法會民主派是去是留？港台《視點31》舉辦《延後之戰》論壇，但前晚嗰集睇到元朗區議員伍健偉好火滾，話數過fb最多like數嘅新界西政治人物係何君堯，竟然有138,542人like，佢嬲嬲哋喺fb出po，決定以like數同何君堯盡地賭一鋪，講明前晚開始，如果佢嘅fb like數喺呢個星期內少過何君堯，將會辭去區議員職務同唔做政治工作，返去做港豬同埋等差佬濫捕，不過佢呢場對賭，就惹起民主派紛爭。
民主派區議員唔多支持伍健偉咁玩，王百羽出po提醒伍，最多人like嘅新界西政治人物係朱凱廸，唔係何君堯喎，仲質疑伍係咪真係會辭職？叫佢唔好咁輕易攞自己嘅議席嚟賭，油尖旺區區議員林兆彬都忍唔住留言，質問咁樣拎個議席去賭，對唔對得住投票畀佢嘅人？
見大家拗得咁激烈，八方問吓伍健偉，係咪over咗？伍健偉就同八方好神秘咁講，其實佢部署緊一件為港人做嘅大事，所以想借住like數睇吓幾多人支持佢，如果一星期後佢嘅like數真係少過何君堯咁點算？伍就話將兌現承諾，唔使擔心會食言，但佢對港人有信心，相信like數要多過何君堯，都唔係咁困難喎。
李八方